Forskrift om graden doctor philosophiae (dr.philos.) ved Universitetet i Tromsø – Noregs arktiske universitet (UiT)

§ 1. Verkeområde

Denne forskrifta gir reglar om retten til å framstilla seg for graden doctor philosophiae (dr.philos.) og om levering og vurdering av avhandling.

§ 2. Målsetting

Graden dr.philos. skal kvalifisera for forskingsverksemd av internasjonal standard og for anna arbeid i samfunnet der det vert stilt høge krav til vitskapeleg innsikt og analytisk tenking, i samsvar med god vitskapleg skikk og forskingsetiske standardar.

§ 3. Ansvar for graden

(1) Universitetsstyret har det overordna ansvaret og fastset forskrift for graden.

(2) Fakulteta har ansvar for å behandla søknader og gjennomføra vurdering innafor sitt fagområde.

§ 4. Terminologi

Disputas	Offentleg drøfting og forsvar (mot kritikk frå opponentane) av ei doktoravhandling før ein får doktorgrad.
Doktorand	Person som forsvarar doktoravhandlinga si i ein disputas.
Ex auditorio	«Frå auditoriet». Ein tilhøyrar ved ein disputas har høve til å melda seg som opponent ex auditorio.
Kandidat	Ein/ei som søker om å få framstilla seg for graden dr.philos.
Kreera	Nemna ut nokon til ein akademisk grad.
Opponent	Komitemedlem som ved ein doktordisputas går kritisk igjennom avhandlinga til doktoranden.
Programstyre	Fakultetsorgan som har ansvar for ph.d.-studiet og for saker som gjeld graden dr.philos.

§ 5. Innhaldet i graden dr.philos.

Graden dr.philos. vert tildelt ved kreering på grunnlag av bestått

doktoravhandling
prøveførelesing over oppgitt emne
forsvar i ein offentleg disputas.

§ 6. Retten til å framstilla seg

(1) Rett til å framstilla seg for prøven for graden dr.philos. har den som er statsborgar i Noreg eller eit anna nordisk land og har mastergrad på fem år eller tilsvarande utdanning, enten integrert mastergrad på 300 studiepoeng eller ein mastergrad på 120 studiepoeng som byggjer på ein bachelorgrad på 180 studiepoeng.

(2) Fakultetet kan gi søkarar som på annan måte har godtgjort tilsvarande kvalifikasjonar i vedkommande fag, høve til å framstilla seg til doktorgradsprøven.

(3) Fakultetet kan etter særleg vurdering gi ein søkar som ikkje er statsborgar i Noreg eller eit anna nordisk land høve til å framstilla seg for prøven. Slikt høve kan til dømes bli gitt dersom søkar har opphaldsløyve i Noreg eller dersom avhandlinga

behandlar emne eller byggjer på materiale som er direkte knytt til Noreg
har sterk tilknyting til norsk forsking innan fagområdet
er utført under opphold ved norsk universitet eller forskningsinstitutt, eller i særleg kontakt med norske forskarar.

§ 7. Søknaden

(1) Søknad om å få framstilla seg skal sendast til vedkommande fakultet i lag med dokumentasjon for utdanning.

(2) Avhandlinga skal leverast samtidig med søknaden. Universitetsdirektøren bestemmer korleis ho skal leverast.

§ 8. Krav til doktoravhandlinga

(1) Avhandlinga skal vera eit sjølvstendig vitskapleg arbeid som oppfyller internasjonale standardar for etikk, fagleg nivå og metode innafor fagområdet. Kandidaten skal gjennom avhandlinga vera med på å utvikla ny fagleg kunnskap, og avhandlinga skal liggja på eit nivå som tilseier at ho vil kunna publiserast som ein del av den vitskaplege litteraturen i faget. Avhandlinga skal liggja på same faglege nivå som ei ph.d.-avhandling, men ha større omfang.

(2) Avhandlinga kan vera ein monografi eller ei samanstilling av fleire mindre arbeid – ei artikkelsamling. I ei artikkelsamling må det vera samanheng mellom delane og det må gjerast greie for denne samanhengen i eit samandrag.

(3) Del av fellesarbeid vert godteke som avhandling i den grad kandidaten sin sjølvstendige innsats kan identifiserast og dokumenterast. Det skal følgja med avhandlinga ei underskriven erklæring som beskriv kandidaten sin innsats i arbeidet/arbeida.

(4) Dersom eit skriftleg arbeid har vorte til i samarbeid med andre forfattarar, skal kandidaten følgja dei normene for medforfattarskap som er allment aksepterte i fagmiljøet og i samsvar med internasjonale standardar.

(5) Dersom avhandlinga hovudsakleg består av artiklar, skal kandidaten normalt vera hovudforfattar av minst halvparten av artiklane.

(6) Avhandlinga skal vera skriven på norsk, svensk, dansk eller engelsk.

§ 9. Arbeid som ikkje vert godtekne

(1) Ein kandidat kan ikkje levera eit arbeid eller deler av eit arbeid som har vore godteke som grunnlag for tidlegare eksamenar, med mindre arbeidet er ein mindre del av ei avhandling med fleire arbeid som heng saman. Data, analysar eller metodar frå tidlegare gradar kan likevel brukast som grunnlag for prosjektet.

(2) Arbeid som er publiserte meir enn åtte år før levering kan ikkje vera del av avhandlinga. Fakultetet kan dispensera frå dette dersom heilt ekstraordinære forhold tilseier det.

(3) Ei avhandling som har vore vurdert / er levert til vurdering ved ein annan lærestad kan ikkje leverast.

§ 10. Offentleggjering av avhandlinga

Avhandlinga skal vera offentleg tilgjengeleg seinast to veker før disputasen. Ho skal gjerast tilgjengeleg i den forma ho vart levert til vurdering, eventuelt etter omarbeiding med grunnlag i § 15 tredje ledd.

§ 11. Oppnemning av komité

(1) Dersom fakultetet kjem til at søkar skal få framstilla seg, skal det – i same sak eller i separat sak – oppnemnast ein sakkunnig komité (bedømmelseskomité) med minst tre medlemmer. Komiteen skal vurdera avhandlinga og disputasen. Fakultetet peikar ut leiar mellom medlemmene.

(2) Instituttet som har det aktuelle faget føreslår komité.

(3) Komiteen skal setjast saman slik at

begge kjønn er representerte
minst ein medlem er tilsett ved universitetet
minst ein medlem ikkje er knytt til universitetet
minst ein medlem ikkje har hovudstilling ved ein norsk institusjon
alle medlemmene har doktorgrad eller tilsvarande kompetanse
minst ein medlem har kompetanse over førstestillingsnivå
fleirtalet i komiteen er eksterne medlemmer
fleirtalet i komiteen er tilsette ved ein doktorgradsgivande institusjon.

(4) Samansetjinga av komiteen skal vera grunngitt og eventuelle avvik frå kriteria skal grunngivast særskilt. Grunngivinga skal visa korleis komiteen samla dekker fagfeltet i avhandlinga.

(5) I særlege tilfelle kan fakultetet nemna opp ein administrativ leiar i tillegg til medlemmene. Han/ho skal ikkje ta del i den faglege vurderinga av avhandlinga.

(6) Fakultetet kan, når det er påkravd, nemna opp ein setjemedlem til komiteen.

(7) Ein/ei som har vore kandidaten sin medforfattar eller andre som er inhabile etter forvaltningslova § 6, kan ikkje vera medlem i, eller administrativ leiar for, komiteen.

(8) Kandidaten skal få melding om forslaget til komité, og få høve til å komma med skriftlege merknader til forslaget innan fem arbeidsdagar etter at han/ho får meldinga.

§ 12. Tilbaketrekking og retting av avhandling

(1) Eit arbeid som er levert kan ikkje trekkjast tilbake før det er endelig avgjort om det er verdig til å forsvarast for doktorgraden.

(2) Kandidaten kan likevel søka fakultetet om få retta formelle feil i avhandlinga etter innlevering. Med søknaden skal kandidaten leggja fram ei fullstendig oversikt over alle feil (errata) han/ho ynskjer å retta. Søknaden må leverast inn seinast fire (4) veker før komiteen sin frist for å levera innstillinga. Det kan berre søkast ein gong. Dersom komitéen har fått kortare frist enn tre månadar på å levera innstillinga, kan fristen kortast forholdsmessig ned.

§ 13. Høve til å innhenta supplerande opplysningar

Komiteen kan krevja å få lagt fram kandidaten sitt grunnlagsmateriale og utfyllande eller oppklarande tilleggsinformasjon.

§ 14. Fristar

(1) Komiteen skal normalt gi si innstilling seinast innan tre månader etter at han har fått avhandlinga levert til vurdering. Dersom kandidaten får høve til omarbeiding av avhandlinga etter § 15 tredje ledd, går det ny frist frå den datoen avhandlinga vert levert på nytt. Det same gjeld ved eventuell ny levering etter § 17.

(2) Disputasen skal så langt råd er haldast innan fire månader etter at avhandling er levert.

§ 15. Innstilling

(1) Komiteen gir innstilling til fakultetet på grunnlag av avhandlinga og eventuelt tilleggsmateriale, jf. § 13. Det skal gå fram av innstillinga om arbeidet er verdig til å forsvarast for doktorgraden eller om ho bør underkjennast. Innstillinga og eventuelle dissensar skal vera grunngitte.

(2) Komiteen kan anbefala at fakultetet gir høve til ei mindre omarbeiding før endeleg innstilling vert vedteken. Komiteen skal i slike tilfelle gi ei konkret, skriftleg, oversikt over kva kandidaten må omarbeida.

(3) Dersom fakultetet tek tilrådinga til følgje, jf. § 16 tredje ledd, skal kandidaten få ein frist for omarbeiding på inntil tre månadar. Det skal fastsetjast ein ny frist for komiteen si endelige innstilling. Kandidaten kan ikkje klaga over eit vedtak om høve til omarbeiding.

(4) Dersom komiteen finn at det er nødvendig med djuptgripande endringar når det gjeld teori, hypotese, materiale eller metode for å kunna gi tilråding om disputas, skal komiteen gi innstilling om underkjenning av avhandlinga.

(5) Fakultetet skal senda kopi av innstillinga til kandidaten. Når innstillinga er samrøystes negativ, ved dissens, og når komiteen anbefaler at kandidaten skal få gjera ei mindre omarbeiding, skal han/ho få høve til å komma med skriftlege merknader med ein frist på ti arbeidsdagar. Dersom kandidaten ikkje ynskjer å fremja merknader, skal han/ho så raskt som mogeleg melda skriftleg frå til fakultetet om det.

(6) Dersom det vert vurdert nødvendig for å opplysa saka, skal fakultetet senda eventuelle merknader til komiteen med ein kort frist for tilbakemelding.

§ 16. Handsaming av innstillinga

(1) Når komiteen si innstilling er samrøystes positiv, er avhandlinga verdig forsvar for graden doctor philosophiae (dr.philos.).

(2) Når komiteen har gitt innstilling med dissens eller samrøystes negativ innstilling, skal fakultetet vurdera om arbeidet er verdig forsvar for graden dr.philos.:

Dersom komiteen finn å kunna leggja innstillinga / fleirtalet si innstilling til grunn, gjer fakultetet vedtak i samsvar med innstillinga.
Dersom fakultetet finn at det er rimeleg tvil om komiteen si innstilling / fleirtalet si innstilling skal leggjast til grunn, kan fakultetet be om nærare avklaring frå komiteen og/eller nemna opp to nye sakkunnige som gir individuell vurdering av avhandlinga eller nemna opp ny komité. Dei sakkunnige skal ikkje vera tilsette ved universitetet, og dei skal ikkje ha hatt noko å gjera med avhandlinga tidligare. For oppnemning av ny komité gjeld § 11. Innstillinga og eventuelle merknader frå kandidaten skal leggjast ved til dei sakkunnige / den nye komiteen.
Tilleggsavklaringar skal leggjast fram for kandidaten, som får høve til å komma med merknader.

(3) Når komiteen anbefaler at kandidaten skal få høve til ei mindre omarbeiding før endeleg innstilling, skal fakultetet vurdera

om det er grunnlag for å ta forslaget til følgje, jf. § 15 andre og tredje ledd eller
om fakultetet skal be komiteen gi endeleg innstilling utan at avhandlinga blir omarbeidd eller
gjera endeleg vedtak på grunnlag av innstillinga og eventuelle merknader frå kandidaten.

(4) Fakultetet skal orientera kandidaten om utfallet av behandlinga.

§ 17. Ny levering

(1) Ei doktoravhandling som vert underkjend, kan leverast til ny vurdering i omarbeidd form ein gong. Slik ny levering kan skje først seks månader etter at det første vedtaket vart gjort.

(2) Kandidaten skal opplysa at arbeidet har vore vurdert tidlegare utan at det vart funne verdig for forsvar. Fakultetet skal informera komiteen om dette. Komiteen kan få den første innstillinga på førespurnad.

§ 18. Prøveførelesing

(1) Kandidaten skal halda prøveførelesing. Prøveførelesinga er ein sjølvstendig del av doktorgradsprøven og skal vera over oppgitt tema. Føremålet er å prøva kandidaten si evne til å tileigna seg kunnskapar ut over avhandlingstemaet og evna til å formidla desse. Komiteen fastset tittel på førelesinga.

(2) Fakultetet skal kunngjera tittelen på prøveførelesinga til kandidaten ti arbeidsdagar før førelesinga. Komiteen fastset tema. Temaet for førelesinga skal ikkje stå i direkte samband med temaet for avhandlinga.

(3) Tittelen på førelesinga skal kunngjerast etter at avhandlinga er levert, og førelesinga skal haldast før disputasen. Fakultetet bestemmer tidspunktet.

(4) Dersom førelesinga skal haldast før innstillinga er klar, kan fakultetet nemna opp ein eigen komité som fastset tema. Minst ein av medlemmene i avhandlingskomiteen skal vera med i førelesningskomiteen, som så langt råd er skal setjast saman i samsvar med krava i § 10 tredje ledd.

(5) Prøveførelesinga skjer på avhandlingsspråket eller norsk med mindre fakultetet godkjenner noko anna.

(6) Komiteen avgjer om prøveførelesninga er bestått eller ikkje bestått, og skal grunngi vedtaket dersom resultatet vert ikkje bestått. Førelesinga skal være bestått før det kan haldast disputas.

(7) Dersom resultatet på prøveførelesinga vert ikkje bestått, kan kandidaten melda seg til ny prøveførelesing. Prøveførelesinga skal haldast over nytt emne, snarast mogeleg og seinast innan seks månader. Så vidt mogeleg skal ho vurderast av den opphavlege komiteen. Ny prøveførelesing kan berre haldast ein gong.

§ 19. Forsvar av avhandlinga

(1) Når doktoranden har halde prøveførelesinga og fått ho godkjend, skal han/ho forsvara avhandlinga i offentleg disputas. Tid og stad for disputasen skal offentleggjerast minst ti arbeidsdagar på førehand saman med opplysningar om korleis avhandlinga er offentleggjort.

(2) Disputasen skjer på avhandlingsspråket eller norsk med mindre fakultetet godkjenner noko anna.

(3) Det skal normalt vera to opponentar. Fakultetet peikar dei ut av og mellom medlemmene av komiteen. I særlege tilfelle kan fakultetet nemna opp opponentar som ikkje har vore medlemmer av komiteen.

(4) Disputasen vert leia av dekan eller den han/ho gir fullmakt. Den som leier disputasen, gjer kort greie for innleveringa og vurderinga av avhandlinga og for prøveførelesinga. Deretter gjer doktoranden greie for siktemålet med og resultatet av den vitskaplege undersøkinga. Første opponent innleier diskusjonen, og andre opponent avsluttar disputasen. Fakultetet kan fastsetja ei anna rekkefølgje og oppgåvefordeling mellom opponentane og mellom doktoranden og første opponent. Andre som er til stades og som ynskjer å opponera ex auditorio, må gi melding om dette til leiar for disputasen innan det tidspunktet leiar fastset og kunngjer ved opninga av disputasen.

§ 20. Godkjenning av doktorgradsprøven

(1) Etter disputasen melder komiteen skriftleg frå om disputasen er godkjend / ikkje godkjend.

(2) Dersom disputasen ikkje vert godkjend, kan doktoranden melda seg til ny disputas. Ny disputas skal gjennomførast snarast mogeleg og seinast innan seks månader. Så vidt mogeleg skal han vurderast av den opphavlege komiteen. Ny disputas kan berre gjennomførast ein gong.

(3) Disputasen må vera godkjend før doktoranden kan bli kreert og få diplom/vitnemål.

§ 21. Kreering og diplom/vitnemål

(1) Når eit fleirtal i komiteen har godkjent disputasen, er doktoranden kreert til doctor philosophiae (dr.philos.).

(2) Universitetet skriv ut diplom/vitnemål.

§ 22. Klage over avslag på søknad om å få framstilla seg

Avslag på søknad om å få framstilla seg for prøven for dr.philos.-graden kan påklagast til universitetets klagenemnd etter reglane i forvaltningslova § 28 flg. Klage skal sendast til fakultetet.

§ 23. Klage over ikkje bestått doktoravhandling med disputas

Stryk på (underkjenning av) avhandling med disputas kan påklagast til universitetets klagenemnd etter reglane i forvaltningslova § 28 flg, jf. uhl. § 4-13 fjerde ledd. Klage skal sendast fakultetet.

§ 24. Ikraftsetjing

Forskrifta tek til å gjelda 1. august 2018. Frå same dato vert forskrift 15. desember 2005 nr. 4996 om graden doctor philosophiae (dr.philos.) ved Universitetet i Tromsø – Noregs arktiske universitet oppheva.