Lovdata – lese-visning

Alle dokumenter › Forskrifter

Forskrift om studium og eksamen ved Høgskulen på Vestlandet

Departement
Kunnskapsdepartementet

Vis endringshistorikk · Abonner (Atom)

Forskrift om studium og eksamen ved Høgskulen på Vestlandet

Kapittel 1. Verkeområde og definisjonar

§ 1-1. Verkeområde

(1) Forskrifta gjeld for studentar som har fått opptak ved Høgskulen på Vestlandet, for privatistar som tek eksamen etter universitets- og høyskoleloven § 11-4 og for studentar under studieopphald i tilknyting til utvekslingsavtalar.
(3) Forskrifta gjeld for forkurs og realfagskurs for ingeniørutdanning, så langt den passar utan å kome i konflikt med nasjonale føresegner for denne utdanninga.
(4) Forskrifta gjeld ikkje for doktorgradsstudium, med unntak av § 3-3 og føresegner som gjeld eksamen og fusk i arbeid som går inn i opplæringsdelen av ph.d.-programmet, jf. forskrift for graden philosophiae doctor (ph.d.) ved Høgskulen på Vestlandet.
(5) Det kan gjelde eigne reglar for fellesgradar. Avvik frå denne forskrifta skal gå fram av samarbeidsavtale og studieplan for fellesgraden, jf. § 2-5 (4).
(7) Nasjonale forskrifter om rammeplanar og forskrifter om retningslinjer er overordna denne forskrifta.

§ 1-2. Definisjonar

(1) Grunnutdanning og integrert mastergradsutdanning er studieprogram der opptak krev fullført utdanning frå vidaregåande opplæring eller godkjent realkompetanse. Det kan gjerast unntak i særlege tilfelle.
(2) Mastergradsutdanning er studieprogram som byggjer på utdanning på bachelorgradsnivå og som fører fram til ein mastergrad.
(4) Vidareutdanning er studiepoengjevande ny formell kompetanse på universitets- og høgskulenivå som til vanleg byggjer på ei fullført grunnutdanning. Dette kan vere både spesielt tilrettelagte enkeltemne eller studieprogram på lågare eller høgare grads nivå.
(5) Etterutdanning eller kurs er ny formell kompetanse på universitets- og høgskulenivå, som ikkje gir studiepoeng.
(6) Oppdragsfinansierte studium og emne blir gjennomført mot vederlag betalt av ein eller fleire oppdragsgjevarar.
(8) Studieprogram er ei samling emne på 30 studiepoeng eller meir med eit samla læringsutbytte som er fastsett i studieplan, som søkjarar kan få opptak og studierett til, og som fører fram til ei fullført utdanning, grad eller yrkesutdanning, jf. kapittel 2.
(9) Studieretning er ei fagleg spesialisering i eit studieprogram, slik ho er definert i studieplanen.
(10) Emne er den minste eininga som gir utteljing i form av studiepoeng, og som kan gå inn i eit studieprogram eller tilbydast med eige opptak. Eit emne har eit læringsutbytte som er fastsett i ein emneplan. Emne skal ikkje ha mindre omfang enn fem studiepoeng. I særlege tilfelle kan det gjerast unntak frå dette.
(11) Studieplan er omtale av studieprogram med tilhøyrande emneplanar. Studieplanen er bindande. Studieplan blir ved Høgskulen på Vestlandet òg nytta som namn på fagplan og programplan etter departementet sin definisjon i nasjonale retningslinjer og rammeplanar, jf. § 3-1 (2). Normal studieprogresjon skal vere 60 studiepoeng per år for eit heiltidsstudium, jf. § 8-7.
(12) Utdanningsplan er ein individuell avtale mellom student og institusjon. Utdanningsplanen skildrar høgskulen sine plikter og ansvar ovanfor studenten, og studenten sine plikter og ansvar ovanfor høgskulen og medstudentar. Utdanningsplanen synleggjer den planlagde faglege progresjonen og gjennomføring av studiet for den enkelte student. Utdanningsplanen baserer seg på studieplanen, jf. § 4-7 (1).
(13) Rammeplanar er nasjonale forskrifter som fastset mål, innhald og organisering av visse utdanningar, og emne som inngår i ei utdanning.

Kapittel 2. Gradar og utdanningar

§ 2-1. Gradar og utdanningar

(1) Høgskulen på Vestlandet tildeler følgjande gradar:
  1. Bachelor, 180 studiepoeng, normert studietid tre år.
  2. Bachelor i nautikk med integrert praksis, 240 studiepoeng, normert studietid fire år.
  3. Master, 120 studiepoeng, normert studietid to år.
  4. Master, integrert, 300 studiepoeng, normert studietid fem år.
  6. Philosophiae doctor (ph.d.), 180 studiepoeng, normert studietid tre år.
(2) Høgskulen på Vestlandet tildeler følgjande yrkesutdanningar
  1. Grunnskulelærarutdanning for 1.–7. trinn og 5.–10. trinn, 240 studiepoeng, normert studietid fire år.
  2. Faglærarutdanning, 180 studiepoeng, normert studietid tre år.

§ 2-2. Krav til graden bachelor

Graden bachelor blir tildelt på grunnlag av eksamen i studieprogram og emne med eit samla omfang på 180 studiepoeng. Grunnlaget for graden skal omfatte eitt av følgjande:
  1. Fullført treårig studieprogram tilsvarande 180 studiepoeng som ifølgje nasjonale rammeplanar og retningslinjer gir bachelorgrad.
  2. Fullført treårig studieprogram tilsvarande 180 studiepoeng som ifølgje vedtak i styret for Høgskulen på Vestlandet gir bachelorgrad.

§ 2-3. Krav til graden master

(2) Høgskulen på Vestlandet tildeler mastergrad med eit omfang på 120 studiepoeng og erfaringsbasert mastergrad på 90 eller 120 studiepoeng, på grunnlag av studieprogram som er akkreditert av Nasjonalt organ for kvalitet i utdanninga (NOKUT), eller akkreditert av høgskulen sjølv.
(3) Høgskulen på Vestlandet tildeler mastergrad med eit omfang på 300 studiepoeng på grunnlag av fullført master i grunnskulelærarutdanning for 1.–7. trinn, grunnskulelærarutdanning 5.–10. trinn, og lærarutdanning for praktiske og estetiske fag 1–13.

§ 2-4. Krav til graden philosophiae doctor (ph.d.)

Krav til graden ph.d. går fram av forskrift om graden philosophiae doctor (ph.d.) ved Høgskulen på Vestlandet, fastsett av styret for Høgskulen på Vestlandet.

§ 2-5. Krav til fellesgradar

(1) Ein fellesgrad er eit samarbeid mellom to eller fleire institusjonar, der desse i fellesskap opprettar og tilbyr eit studieprogram. Deltakande institusjonar har felles ansvar for opptak, undervisning, utvekslingstilbod, rettleiing og tildeling av vitnemål for fullført grad.
(2) For fellesgrad gjeld dei same krava til samansetjing av graden som til grad tildelt av Høgskulen på Vestlandet.
(3) For fellesgrad kan det gjerast unntak frå tilknytingskravet etter § 2-6.
(4) Ved etablering av fellesgrad skal det vere utarbeidd og godkjend studieplan og ein samarbeidsavtale som regulerer fagleg samarbeid, administrasjon og økonomiske forhold.
(5) Rektor godkjenner samarbeidsavtalar med andre institusjonar om etablering av fellesgradar.

§ 2-7. Krav om nye studiepoeng ved tildeling av ny grad som byggjer på ein fullført grad

Når ein student er kvalifisert for vitnemål for ei utdanning/grad og denne byggjer på tidlegare vitnemål for utdanning/grad, må studenten ha tatt minst 60 nye studiepoeng som ikkje har inngått i tidlegare godkjent grad, jf. forskrift til universitets- og høyskoleloven § 2-17.

§ 2-8. Tillegg for namn for gradar

(1) Grad som blir tildelt på grunnlag av fullført treårig studieprogram på lågare grads nivå (første syklus) får normalt namnet «bachelor i <namn på studiet>», med eventuelt tillegg av namn på linje, studieretning eller liknande. Andre tillegg til namnet blir fastsett i samband med godkjenning av studieplanen.
(2) Grad som blir tildelt på grunnlag av fullført studieprogram på høgare grads nivå (andre syklus) får normalt namnet «master i <namn på studiet>», med eventuelt tillegg av namn på linje, studieretning eller liknande. Andre tillegg til namnet blir fastsett i samband med godkjenning av studieplanen.
(3) Engelske namn på gradar ved Høgskulen på Vestlandet blir fastsett i samband med akkreditering av studieprogrammet, etter same prinsipp som i (1) og (2).

§ 2-9. Internt fagleg overlapp

(1) Fagleg overlapp mellom emne ved Høgskulen på Vestlandet skal gå fram av emneplanane i form av talet studiepoeng fagleg overlapp omfattar (studiepoengsreduksjon). Dette gjeld òg fagleg overlapp med utgåtte emne.

§ 2-10. Fagleg godkjenning av utdanning

(1) Høgskulen på Vestlandet godkjenner beståtte emne, eksamenar eller prøvar tekne ved høgskulen eller andre universitet og høgskular som tilbyr akkrediterte studiar, i den utstrekning dei oppfyller dei faglege krava for ein bestemt eksamen, eit bestemt emne, ein bestemt utdanning eller ein bestemt grad ved Høgskulen på Vestlandet, jf. universitets- og høyskoleloven § 9-1 første ledd. Godkjent utdanning skal gå inn i grad tildelt frå Høgskulen på Vestlandet.
(2) Det blir ikkje godkjent emne til erstatning for emne ved høgskulen som studenten allereie har bestått.
(3) Studentar som har fått godkjent emne frå tidlegare utdanning, men likevel tek tilsvarande emne ved høgskulen og ønskjer dette på vitnemålet i staden, må sjølv be om oppheving av godkjenningsvedtaket innan to veker før vitnemål skal skrivast ut, jf. § 14-2. Det er ikkje mogeleg å oppheve godkjenningsvedtak om emnet er avlagt som del av graden på utvekslingsopphald.

§ 2-11. Fagleg godkjenning av utanlandsk utdanning, anna utdanning og realkompetanse

(1) Høgskulen skal godkjenne utanlandske emne/kvalifikasjonar frå ein stat som har ratifisert Lisboakonvensjonen, med mindre høgskulen kan påvise betydelege forskjellar mellom utdanninga det er søkt om godkjenning for og utdanninga den samanliknast med, jf. universitets- og høyskoleloven § 9-3 andre ledd.

§ 2-12. Studiepoeng ved godkjenning av emne

Godkjenning av emne i eit av høgskulen sine studieprogram kan ikkje gi fleire studiepoeng enn det emnet ga på institusjonen der emnet blei tatt. Godkjenning av emne kan heller ikkje gi fleire studiepoeng enn det som ligg i emnet som blir erstatta ved høgskulen.

Kapittel 3. Etablering, endring og nedlegging av studieprogram og emne

§ 3-1. Studiestruktur og studieplan

(1) Studium ved Høgskulen på Vestlandet er organisert som studieprogram og emne, jf. § 1-2 (8) og (10). Alle studieprogram og emne blir tilbydde på grunnlag av godkjend studie- eller emneplan.
(2) Alle studieprogram, studie- og emneplanar skal utarbeidast i tråd med nasjonale forskrifter og retningslinjer, nasjonalt kvalifikasjonsrammeverk for livslang læring, samt prosessar og malar for studie- og emneplanar fastsett i høgskulen sitt system for arbeid med kvalitet i utdanningane.

§ 3-2. Akkreditering og etablering av nye studieprogram

(2) Styret sjølv gjer vedtak om etablering av nye studieprogram med eit omfang på over 60 studiepoeng. Styret gjer vedtak på grunnlag av godkjend utgreiingsløyve, og vedtak om akkreditering i Utdanningsutvalet.
(3) Dekan sjølv vurderer studieprogram i høve krav til akkreditering av studietilbod i forskrift til universitets- og høyskoleloven, godkjenner studie- og emneplanar og gjer vedtak om etablering av studieprogram og emne til og med 60 studiepoeng.
(4) Alle studieprogram skal vere knytt til eit fakultet, eit studieprogramråd og ha ein studieprogramansvarleg med eit definert ansvar. Når eit studieprogram er sett saman av emne frå fleire fakultet, skal organet som treff vedtak om etablering avgjere kva fakultet som skal ha det samla faglege ansvaret.

§ 3-3. Endring av etablerte studieprogram og studieplanar

(1) Utdanningsutvalet ved høgskulen gjer vedtak om godkjenning av vesentlege endringar i etablerte studieprogram i tråd med retningslinjer fastsett av høgskulen.
(2) Programutvalet godkjenner endringar i ph.d.-program innanfor ramma av akkreditering.
(3) Dekan gjer vedtak om oppretting av nye emne eller nedlegging av eksisterande emne i bachelor- og masterprogram, og godkjenner revisjon av eksisterande emne innan høgskulen sine fastsette fristar. Endringane gjeld frå påfølgjande studieår.
(4) Ved endring i studieprogram for studentar i normert løp, skal det utarbeidast overgangsordningar som sikrar at det samla læringsutbyttet for studiet blir vidareført, og at studentane får fullført på normert tid.
(5) Dekan kan avlyse valemne som ikkje er obligatoriske i eit studieprogram, om studenttalet er lågt eller det ligg føre andre særlege grunner. Dekan fastset frist for avlysing.

§ 3-4. Nedlegging og nullopptak

(1) Dersom høgskulen i samband med gjennomgang av studieportefølje vurderer å leggje ned eit studieprogram, avvikle studieprogrammet på ein av studiestadane, eller ha nullopptak på programmet skal dekan sikre medverknad frå studentar, fagmiljø og samfunns- og arbeidsliv. Medverknaden skal vere i tråd med vedtekne prosess-skildringar og retningslinjer.
(2) Styret sjølv vedtek nedlegging og nullopptak på studieprogram over 60 studiepoeng og fastset overgangstid og -ordning for undervisning, vurdering og utferding av vitnemål, slik at studentane får fullført på normert tid.
(3) Dekan sjølv vedtek nedlegging og nullopptak på studieprogram til og med 60 studiepoeng og fastset overgangstid og -ordning for undervisning, vurdering og utferding av vitnemål.
(4) Det skal utarbeidast overgangsordning ved nedlegging av studieprogram. Dersom anna ikkje er bestemt i overgangsordninga eller i forskrift om rammeplan til studieprogrammet, kan høgskulen produsere vitnemål inntil fem år etter siste avslutta undervisingssemester.

Kapittel 4. Studierett

§ 4-1. Studierett

(2) Studierett er å vere tatt opp som student ved eit studieprogram eller emne og ha studentstatus. Studieretten gjev rett til å følgje lukka undervisning, gjennomføre praksis, kurs og seminar og gå opp til eksamen i samsvar med gjeldande studieplan.
(3) Studieretten er knytt til studieprogram eller emne på den studiestaden studenten har fått opptak til. Dekan kan avgjera at særskilde emne kan vere opne for programstudentar ved andre studiestader ved høgskulen.
(4) For studium som tilbyr alternative opptaksvegar, der studentar kan oppfylle opptakskrava gjennom tilpassa kurs i studieprogrammet, kan studieplanen fastsetje krav om at desse kursa må vere bestått innan gitte fristar for å kunne fortsetje på studiet.
(5) På førespurnad frå høgskulen må studentar leggje fram originaldokument som grunnlag for opptak til studium eller for utferding av vitnemål ved Høgskulen på Vestlandet. Studentar som ikkje legg fram desse originaldokumenta for kontroll, kan miste studieretten. Karakterutskrift og vitnemål frå Høgskulen på Vestlandet blir halde att til dei etterspurde dokumenta er lagt fram og kontrollert.

§ 4-2. Semesterregistrering

(1) Studenten må fullføre semesterregistrering kvart semester for at studieretten skal vere gyldig. Fristen for semesterregistrering er 1. september i haustsemesteret og 1. februar i vårsemesteret. For vidareutdanningar, utdanningar med studieavgift og oppdragsbaserte utdanningar med oppstart etter semesterregistreringsfristen 1. september i haustsemesteret og 1. februar i vårsemesteret, er fristen seinast 14 dagar etter oppstart.
(2) Innan fristen må alle studentar semesterregistrere seg ved å:
  1. registrere seg på Studentweb
  2. godkjenne utdanningsplan for studieprogram dei er tekne opp til
  3. melde seg opp til undervisning og vurdering for emne dei skal ta i det aktuelle semesteret
  4. betale semesteravgift, jf. § 4-5.
(3) Studenten pliktar å halde seg oppdatert på relevant regelverk for studium og eksamen, og om organiseringa av studiet, obligatoriske læringsaktivitetar, tidsfristar og annan relevant informasjon. Studenten pliktar òg å halde seg orientert om meldingar som blir gitt via høgskulen sin læringsplattform, og informasjon som blir sendt frå høgskulen til studenten sin e-postadresse ved lærestaden.

§ 4-3. Lengd på studieretten

(1) Studentar blir tildelt studierett tilsvarande normert studietid for studieprogrammet dei er tatt opp til.
(2) Studentar som er tatt opp til studieprogram med to års normert studietid eller kortare, kan etter avtale om endring av utdanningsplan jf. § 4-6 (4), få utvida studieretten inntil eitt år ut over normert studietid.
(3) Studentar som er tatt opp til studieprogram med tre års normert studietid eller lengre, kan etter avtale om endring av utdanningsplan jf. § 4-6 (4), få utvida studieretten inntil to år ut over normert studietid.
(4) Studentar som er tatt opp til studieprogram med fem års normert studietid, kan etter avtale om endring av utdanningsplan jf. § 4-6 (4), få utvida studieretten inntil tre år ut over normert studietid.
(5) Deltakarar på eigne kvalifiseringskurs for studium, til dømes forkurs og realfagskurs, kan ikkje utvide studietida.
(6) Avgrensinga i studieretten gjeld ikkje for utsett studiestart, permisjonar etter § 5-1 og mellombels utestenging etter vedtak i høgskulen si nemnd for studentsaker.
(7) Når studieretten er brukt opp, fell han bort. Studenten må søke nytt opptak for å kunne fullføre utdanninga.
(8) Studieretten fell òg bort når studieprogrammet er fullført og bestått. Det same gjeld emnestudentar når eksamen er gjennomført.

§ 4-4. Poststudierett

(1) Studentar som har fullført eit studieprogram, har rett til poststudierett i inntil to påfølgjande semester etter fullføring. Poststudierett kan nyttast til å forbetre karakter på individuell eksamen i emne der dette er mogleg, og til å ta nye emne på studieprogrammet.
(2) Søknadsfrist for poststudierett er 15. august i haustsemesteret og 15. januar i vårsemesteret.
(3) Forbetra karakterar og nye emne på studieprogrammet blir dokumenterte med karakterutskrift frå Vitnemålsportalen eller Studentweb. Det blir ikkje utferda nytt vitnemål.

§ 4-5. Semesteravgift, kopi- og læremiddelavgift og vederlag privatistar

(1) Alle studentar skal kvart semester betale semesteravgift, jf. lov om studentsamskipnader § 10, og kopi- og læremiddelavgift. Styret fastset kopi- og læremiddelavgift. Fristen for å betale er 1. september i haustsemesteret og 1. februar i vårsemesteret. For vidareutdanningar, utdanningar med studieavgift og oppdragsbaserte utdanningar med oppstart etter 1. september i haustsemesteret og 1. februar i vårsemesteret, er fristen for betale seinast 14 dagar etter oppstart.
(2) Studentar som er tatt opp til studium som til saman er normert til mindre enn 15 studiepoeng per semester, skal betale kopi- og læremiddelavgift berre i semester med eksamen. Studenten kan velje å betale semesteravgift i semester utan eksamen.
(4) Studentar som reiser på utveksling til utlandet, skal betale semesteravgift og kopi- og læremiddelavgift til Høgskulen på Vestlandet, dersom ikkje anna går fram av samarbeidsavtalen med institusjonen i utlandet.
(5) Studentar som kjem til Høgskulen på Vestlandet gjennom ein utvekslingsavtale (Nordplus, Erasmus+ og bilaterale avtalar), betaler semesteravgift til heimeinstitusjonen. Internasjonale studentar som ikkje er knytt til ein utvekslingsavtale, skal betale semesteravgift og kopi- og læremiddelavgift til Høgskulen på Vestlandet, dersom det ikkje eksisterer nokon avtale om fritak.
(7) Studentar på oppdragsbaserte studieprogram som er finansiert av oppdragsgivar eller med eigenbetaling ved studieavgift frå studenten sjølv, betaler ikkje kopi- og læremiddelavgift.
(8) Høgskulen kan bestemme at deltakarane på eit oppdragsbasert studieprogram får fritak frå semesteravgift, når det etter ei samla vurdering av undervisninga sitt omfang, undervisnings- og eksamensstad og andre forhold ikkje verkar rimeleg å rekne deltakarane som studentar, jf. forskrift om studentsamskipnader § 17 sjette ledd. Ved tvil skal høgskulen rådføre seg med studentsamskipnaden. Deltakaren kan likevel velje å betale semesteravgift.
(9) Semesteravgifta må vere betalt før studenten kan få studentkort og studentbevis.
(10) Deltakarar på etterutdanningskurs og andre kurs det ikkje er knytt studiepoeng til, betaler ikkje semesteravgift.
(13) Studentar som er mellombels utestengt etter vedtak i høgskulen si nemnd for studentsaker skal ikkje betale semesteravgift eller kopi- og læremiddelavgift.

§ 4-6. Utdanningsplan og studieprogresjon

(1) Utdanningsplanen er ein individuell avtale mellom studenten og høgskulen som viser planlagt fagleg progresjon og gjennomføring av studiet. Utdanningsplanen byggjer på studieplanen for studieprogrammet som studenten er tatt opp til, og er grunnlaget for grad og vitnemål.
(2) Studentar som blir tatt opp til studium på 60 studiepoeng eller meir, skal ha ein utdanningsplan, jf. universitets- og høyskoleloven § 11-3. Utdanningsplanen skal vere sett opp slik at studenten skal gjennomføre planlagt studieløp på normert tid som heiltids- eller deltidsstudent.
(3) Studieplanen kan setje krav til progresjon. Studentar som ikkje oppfyller progresjonskrava vil bli flytta ned eit kull, og få ein tilpassa utdanningsplan. I nokre studieprogram kan det gjerast unntak i særlege tilfelle.
(4) Alle endringar i utdanningsplanen må skje innanfor rammene i § 4-3 og studieplanen, og innan fristen for semesterregistrering.
(5) Studentar som ikkje følger normert progresjon for studieprogrammet, må rekne med å følgje gjeldande studieplan og eksamensordningane som går fram av denne.
(6) For studentar med lågare progresjon enn normert, permisjon etter § 5-1 eller andre opphald i studiet, kan forkunnskapskrav fastsett i emneplan gjere at tidlegare fullførte emne må takast på nytt.

§ 4-7. Studierett på emne

(1) Emne med ledig kapasitet kan lysast ut som enkeltemne.
(2) Emnestudentar har opptak til eitt eller fleire enkeltemne utan å ha studierett til studieprogrammet emnet høyrer til. Dei skal følgje ordinær undervisning med dei same rettane og pliktene på emnet som programstudentar.
(4) Studierett på emne gjeld berre det eller dei semestera det er gitt opptak til. Dersom eksamen ikkje er bestått, kan studenten melde seg opp til påfølgjande ny eksamen.

§ 4-8. Tap av studierett

(2) Studentar som blir stoppa av progresjonskrav taper studieretten når dei
  1. har brukt alle forsøka på å fullføre eit emne, eksamen eller praksisperiode utan godkjent resultat, jf. § 10-12 og § 11-5, eller
(3) Studentar som har brukt opp forsøk på ein eksamen utan bestått resultat, får etter § 11-5 nye forsøk i emnet fem år etter siste eksamensforsøk. Studentar som har brukt opp forsøk i eit praksisemne utan å få bestått resultat, får etter § 10-12 nye forsøk fem år etter siste forsøk. Ved nytt opptak må det vurderast fagleg om studenten kan starte på same nivå.
(4) Studentar som ikkje oppnår studiepoeng i eit program i to semester på rad, taper studieretten til programmet. I desse to semestera inngår ikkje innvilga permisjonar, opphald i progresjon som går fram av utdanningsplanen og mellombels utestenging frå høgskulen etter vedtak i høgskulen si klagenemnd.
(5) Studierett som er stengd kan bli gjenopna innan eitt år etter han er stengd, om det ligg føre særlege grunnar og stenginga rammar studenten utilsikta og uforholdsmessig hardt. Fakultetet avgjer søknad om å opne stengd studierett, og set opp ny utdanningsplan med nytt sluttpunkt for studieretten. Studierett kan berre bli gjenopna for same studieprogram.
(6) Studentar som får opptak til eit nytt studieprogram ved HVL med ei varigheit på meir enn eitt semester, taper studieretten til det tidlegare studieprogrammet, med mindre det er gode faglege grunnar for å ha fleire studierettar samtidig. Dette gjeld ikkje for etter- og vidareutdanningar.

Kapittel 5. Permisjon

§ 5-1. Dokumentert permisjon

(1) Studentar har rett til permisjon frå studieprogram på grunnlag av dokumentert sjukdom skrive ut av lege, psykolog, eller anna sakkunnig person. Studentar kan òg få permisjon på grunnlag av tenesteplikt etter forsvarsloven § 17, møteplikt i offentlege organ, krevjande verv i studentdemokratiet og studentorganisasjonar, eller andre særleg tungtvegande tilhøve. Sjå òg § 5-2 (5). Retten til foreldrepermisjon går fram av universitets- og høyskoleloven § 10-6.
(2) Permisjonstida kjem i tillegg til retten studenten har til utvida studietid, jf. § 4-3.
(3) Søknad om dokumentert permisjon kan bli avslått på grunnlag av at forlenging av studieretten vil føre til senking av dei faglege krava til studiet. Kunnskapar, ferdigheiter og generell kompetanse i læringsutbyttet som går fram av studie- og emneplan kan ikkje falle bort, jf. § 7-2 (2).

§ 5-2. Permisjon utan dokumentert grunn

(1) Studentar som er tatt opp til studieprogram med tre års normert studietid eller kortare, kan få permisjon frå studiet utan dokumentert grunn i inntil to semester.
(2) Studentar som er tekne opp til studieprogram med fire års normert studietid eller lengre, kan få permisjon frå studiet utan dokumentert grunn i inntil fire semester.
(3) Permisjon utan dokumentert grunn blir ikkje innvilga første semester etter opptak. Permisjonstida kjem ikkje i tillegg til retten studenten har til utvida studietid, jf. § 4-3.
(4) For studieprogram med opptak av berre eitt kull, uregelmessig opptak, eller opptak anna kvart år kan permisjonstida forlengast til når det er mogleg for studenten å ta opp igjen studiet. Dette med atterhald om at studiet framleis blir tilbydd.
(5) Emnestudentar, studentar på forkurs, realfagskurs og studium kortare enn eitt år, kan ikkje søke om permisjon.
(6) Søknad om permisjon utan dokumentert grunn kan bli avslått på grunnlag av at forlenging av studieretten vil føre til senking av dei faglege krava til studiet. Kunnskapar, ferdigheiter og generell kompetanse i læringsutbyttet som går fram av studie- og emneplan kan ikkje falle bort, jf. § 7-2 (2).

§ 5-2a. Vilkår for studentar på oppdragsfinansierte studium finansiert av staten

Oppdragsfinansierte studium finansiert av staten, kan gi studentar særrettar regulert som krav frå oppdragsgivar i avtalen, til dømes utviding av retten til permisjon.

§ 5-2b. Vilkår for betalingsstudium og studieavgift

Studentar på betalingsstudium som er finansiert med eigenbetaling ved studieavgift betalt av studenten, gjeld følgjande:
  • Etter utløp av angrefristen gjeld følgjande forpliktingar:
    1. Etter utløp av angrefrist og før studiet har starta opp:
      1. Studenten kan søke om permisjon og ta opp igjen studia neste gong studia startar opp. Studenten blir belasta for studieavgift første semester.
      2. Dersom studenten avbryt studia og ikkje startar opp på studiet ved neste opptak, er studieavgifta for første semester tapt for studenten.
    2. Etter at studiet har starta opp:
      1. Studenten kan søke om permisjon frå studiet i inntil to semester. Studenten betaler studieavgift for inneverande (påbegynte) semester og kan starte opp ved første moglegheit om emnet blir tilbydd igjen. Dersom studenten likevel avbryt studia, er studieavgifta for inneverande semester tapt for student. I tillegg blir studenten belasta for studieavgift for påfølgjande semester.
    3. Ved eventuell godkjenning av permisjonssøknad, tar høgskulen atterhald om at studiet framleis blir tilbode etter at permisjonstida er gått ut.

§ 5-3. Nedre grense for permisjon

Permisjon blir innvilga for eitt eller to semester. Det blir ikkje innvilga permisjon for kortare periodar enn eitt heilt semester anna enn i særlege tilfelle. Ved utdanningar der organisering av praksis eller anna tilseier det, blir det ikkje innvilga kortare permisjon enn eitt år.

§ 5-4. Frist for å søke permisjon

(1) Frist for å søke permisjon er 1. september for haustsemesteret og 1. februar for vårsemesteret.
(2) For vidareutdanningar, utdanningar med studieavgift og oppdragsbaserte utdanningar med oppstart etter semesterregistreringsfristen 1. september i haustsemesteret og 1. februar i vårsemesteret, er fristen seinast 14 dagar etter oppstart.
(3) Dersom det oppstår behov for permisjon med dokumentert grunnlag etter fristen, må studenten søke så snart som mogleg. Betalt semesteravgift blir ikkje refundert når søknaden kjem inn etter fristen.

§ 5-5. Under permisjonen

(1) Studentar i permisjon skal ikkje betale semesteravgift eller stadfeste studieretten. Ved permisjon med dokumentert grunn kan studenten velje å betale semesteravgift.
(2) Studentar som har permisjon på grunn av fødsel eller omsorg for born, eller som har rett på permisjon etter universitets- og høyskoleloven § 10-7, kan melde seg til eksamen i permisjonstida. Studenten skal då semesterregistrere seg og betale semesteravgift i samsvar med kapittel 4.

§ 5-6. Etter permisjonen

Etter permisjonen blir studenten plassert i eit kull med tilsvarande progresjon. Studenten må gjennomføre studiet i samsvar med gjeldande studieplan, når han eller ho tek opp att studiet, jf. § 4-6 (5).

Kapittel 6. Privatist

§ 6-1. Eksamensrett for privatistar

(3) For å kunne ta eksamen, må privatisten:
  1. Dekkje opptakskravet til studieprogrammet som emnet høyrer til, jf. forskrift om opptak ved Høgskulen på Vestlandet, kapittel 2.
  2. Dekkje eventuelle forkunnskapskrav for emnet.
  3. På fastsett måte og innan fastsett frist søke om å få ta eksamen i emnet. Fristen for å søke er 1. desember for vårsemesteret og 1. juni for haustsemesteret. Dokumentasjon av generell studiekompetanse og eventuelle tilleggskrav skal leggjast ved søknaden.
(4) Privatistar skal innan fastsett frist betale semesteravgift og vederlag til høgskulen, jf. § 4-5 (11). Vederlag som er betalt av privatist blir ikkje tilbakebetalt.

§ 6-2. Eksamensforsøk for privatistar

(1) Privatistar kan ikkje ta eksamen i same emne meir enn 3 gonger ved høgskulen, inkludert eventuelle forsøk han eller ho har gjennomført i det same emnet tidlegare, jf. § 11-5 og § 11-6.
(2) Privatistar som ikkje trekk seg frå eksamen eller ikkje har dokumentert gyldig fråvær under eksamen har brukt eitt forsøk på eksamenen, jf. § 11-6.
(3) Privatistar har ikkje rett på ny eksamen ved stryk, ugyldig fråvær eller gyldig fråvær. Ved stryk eller ugyldig fråvær må ein søke om oppmelding på nytt, betale nytt vederlag og semesteravgift ved nytt semester, jf. 4-5 (11). Ved gyldig fråvær skal privatisten betale nytt redusert vederlag og semesteravgift ved nytt semester.

§ 6-3. Undervisning for privatistar

(1) Privatistar har berre tilgang til open undervisning i emnet og til å gå opp til eksamen.

Kapittel 7. Tilrettelegging

§ 7-1. Rett til tilrettelegging

Studentar med funksjonsnedsetting og særskilte behov sin rett til tilrettelegging følgjer av universitets- og høyskoleloven § 10-5 og § 10-6. Rett til tilrettelegging gjeld til dømes ved funksjonsnedsetting, sjukdom, graviditet og amming. Tilrettelegging for studentar med verv i høgskulen sine vedtekne organ og utval samt tillitsvalde i studentdemokratiet går fram av samarbeidsavtalen med Studenttinget på Vestlandet. Tilrettelegging for studentar med toppidrettsstatus går fram av avtale med Olympiatoppen.

§ 7-2. Val av tilretteleggingstiltak

(1) Studenten skal få eigna individuell tilrettelegging.
(2) Tilrettelegginga er avgrensa til tiltak som ikkje er urimeleg ressurskrevjande for høgskulen, sett i høve til kor mykje tiltaket bygger ned hindringar for personar med funksjonsnedsettingar.
(3) Tilrettelegginga kan ikkje føre til senking av dei faglege krava til studiet. Kunnskapar, ferdigheiter og generell kompetanse i læringsutbyttet som går fram av studie- og emneplan kan ikkje falle bort. Desse krava kan heller ikkje setjast til side av avtale.
(4) Tilrettelegging av utdanningsplan må skje innafor ramma av § 4-6.

§ 7-3. Tilrettelegging av undervisning og obligatoriske læringsaktiviteter

(1) Dokumentert søknad om tilrettelegging av undervisning og obligatoriske læringsaktivitetar skal sendast høgskulen seinast innan 1. september i haustsemesteret eller 1. februar i vårsemesteret, eller straks behovet for tilrettelegging blir kjent.
(2) Høgskulen utarbeider eigna tilrettelegging innanfor ramma av § 7-2.

§ 7-4. Tilrettelegging av eksamen

(1) Dokumentert søknad om tilrettelegging av eksamen skal sendast høgskulen seinast innan 1. september i haustsemesteret og 1. februar i vårsemesteret, eller straks behovet for tilrettelegging blir kjent.
(2) Høgskulen utarbeider eigna tilrettelegging innanfor ramma av § 7-2.
(3) Utvida tid til skuleeksamen blir gitt som ti minuttar pr. eksamenstime, men kan ikkje gå over ein time totalt. Tid til amming kjem i tillegg.
(4) Utvida tid til heimeeksamen og oppgåver blir berre innvilga i særlege tilfelle, der sjukdom eller andre tungtvegande tilhøve gjer at studenten ikkje kan arbeide i lengre tidsrom under eksamen. Maksimal utvida tid blir sett i høve til lengd på oppgåva. For heimeeksamen som varar åtte timar eller kortare gjeld same regel som for skuleeksamen, sjå punkt 3.
(5) Utvida tid til master- eller bacheloroppgåve blir berre innvilga i særlege tilfelle, inntil to veker eller til neste semester sin frist for innlevering. Utviding med eitt semester blir berre gitt to gonger. Høve til å trekke vurderingsmelding og levere ved ny ordinær frist er regulert i kapittel 11.
(6) Det blir ikkje gitt utvida tid til munnleg, justerande munnleg og praktisk eksamen.
(7) Studentar som har eit anna morsmål enn norsk og som har budd i Norge i mindre enn tre år kan søkje om utvida tid ved eksamen.
(8) Studentar med eit anna morsmål enn norsk kan få bruke tospråkleg ordbok utan ordforklaring, med mindre faglege omsyn talar mot dette. Ordboka blir kontrollert.
(9) Ved tungtvegande helse- eller sosiale grunnar kan studentar gjennomføre skriftleg skuleeksamen utanfor institusjonen. Høgskulen kan etter søknad godkjenne at eksamen blir avvikla utanfor institusjonen, når dette kan skje under forsvarleg kontroll. Eksamensstaden skal godkjennast av høgskulen på førehand. Frist for søknad er 1. september i haustsemesteret og 1. februar i vårsemesteret, eller straks etter behovet for tilrettelegging blir kjent.

§ 7-5. Tilrettelegging av praksis

(1) Dokumentert søknad om tilrettelegging av praksis sendast fakultetet seinast 1. april for praksis som startar i haustsemesteret eller 1. oktober for praksis som startar i vårsemesteret. Ved praksis i løpet av første semester er søknadsfristen 1. september. Desse fristane gjeld òg søknad om å få gjennomføre praksis på ein særskilt stad, jf. tredje ledd. Ved situasjonar som har oppstått akutt blir søknad handsama jamleg.
(2) I samråd med praksisstaden utarbeider høgskulen eigna tilrettelegging innanfor ramma av § 7-2.
(3) Søknader om å gjennomføre praksis på særskilt stad blir tildelt innanfor ramma av § 7-2, og vurdert etter følgjande vilkår i prioritert rekkefølgje:
  1. åleineansvar for born under 18 år
  2. eigen sjukdom eller diagnose som gir behov for praksis på særskilt stad
  3. dagleg omsorg for born under 12 år
  4. funksjonsvanskar eller alvorleg sjukdom i nær familie
  5. toppidrettsstatus eller utøvar på landslaget
  6. utøvar i øvste divisjon i lagidrett
  7. enkeltutøvar på nasjonalt nivå
  8. verv i Studenttinget, studentråd eller høgskulestyret.

§ 7-6. Tilrettelegging av fysisk læringsmiljø

(1) Studentar med behov for fysisk tilrettelegging av læringsmiljøet som t.d. fast lesesalsplass, spesialmøblar eller skjerming, kan søke om dette. Dokumentert søknad skal sendast høgskulen seinast innan 1. september i haustsemesteret og 1. februar i vårsemesteret, eller straks behovet for tilrettelegginga blir kjent.
(2) Høgskulen utarbeider tilrettelegging av fysisk læringsmiljø innanfor ramma av § 7-2.

§ 7-7. Dokumentasjon

(1) Dokumentasjon på funksjonsnedsetting og særskilt behov for tilrettelegging skal vere skrive ut av lege, psykolog eller annan sakkunnig person.
(2) Dokumentasjonen må syne dei vanskane studenten har med å oppnå læringsutbyttet, eller med å gjennomføre undervisning, praksis eller eksamen.
(3) Dokumentasjonen bør gje døme på tilretteleggingstiltak som kan vere eigna.
(4) Bruk av falsk dokumentasjon er ulovleg og skal meldast til politiet.

Kapittel 8. Undervisning

§ 8-1. Studieår og undervisingsterminar

(1) Studieåret ved Høgskulen på Vestlandet er 10 månadar. Ordinær studiestart er medio august. Studieåret blir avslutta ultimo juni. Rektor fastset undervisningsterminar for alle typar utdanningar, jf. universitets- og høyskoleloven § 11-2.
(2) Undervisning og ordinær eksamen skal avviklast innanfor studieåret.
(3) Forkurs, deltidsstudium, studieprogram i tresemesterordning, y-veg, eksterne sertifikatkurs og eksternt finansierte tilbod kan ha avvikande studieår.

§ 8-2. Timeplanar

(1) Timeplanar med informasjon om tid og stad for gjennomføring av undervisningsaktivitetane skal vere tilgjengelege på høgskulen sine nettsider innan fastsette fristar.
(2) Dersom det er nødvendig å endre tid og stad for undervisning etter publisering, skal endringa kunngjerast så snart som mogeleg.
(3) Når det på grunn av omstende utanfor høgskulen sin kontroll er nødvendig å endre tidspunkt for obligatoriske læringsaktivitetar skal endringa kunngjerast så snart som mogleg og ikkje seinare enn to veker før nytt undervisningstidspunkt. Dersom det ikkje er mogeleg å halde fristen på to veker, må studentane få tilbod om alternativ læringsaktivitet for å dekke læringsutbyttet.

§ 8-3. Litteratur- og pensumlister

Litteratur- og pensumlister skal vere publiserte innan starten av kvart semester.

§ 8-4. Obligatoriske læringsaktivitetar

(1) Obligatoriske læringsaktivitetar er alle krav som er sett som vilkår for å ha rett til å ta eksamen eller få framstille seg til sluttvurdering i praksisstudium. For praksisstudium gjeld eigne vilkår, sjå kapittel 10. Obligatoriske læringsaktivitetar blir vurdert til godkjent / ikkje godkjent og resultatet er ikkje del av karaktergrunnlaget i emnet.
(2) Obligatoriske læringsaktivitetar blir fastsett i emneplanen.
(3) I emne med obligatorisk deltaking i undervisninga er kravet til frammøte 80 prosent om ikkje emneplanen seier noko anna.
(4) Dersom ikkje emneplanen presiserer noko anna, er godkjende obligatoriske læringsaktivitetar gyldig utan tidsavgrensing.
(5) Emneansvarleg fastset frist for når obligatoriske læringsaktivitetar skal vere fullført. Så langt det lar seg gjere, skal fristen vere slik at studenten har høve til å gjennomføre eit nytt forsøk på ikkje godkjente obligatoriske læringsaktivitetar, før godkjende og ikkje godkjende obligatoriske læringsaktivitetar skal registrerast for semesteret. Studenten har rett på grunngjeving av ikkje godkjente obligatoriske læringsaktivitetar.
(6) Emneansvarleg er ansvarleg for å registrere godkjende og ikkje godkjende obligatoriske læringsaktivitetar seinast to veker før eksamen tek til. I emne som avsluttar undervisninga tett opp til eksamen skal obligatoriske læringsaktivitetar vere registrerte éin dag etter siste undervisningsdag. Alle obligatoriske læringsaktivitetar skal vere godkjende før eksamensdagen, før datoen for siste innlevering av skriftleg arbeid eller før sluttvurdering.

§ 8-5. Undervisningsspråk

(1) Undervisningsspråket ved Høgskulen på Vestlandet er norsk. Det kan gjerast unntak dersom det ligg føre faglege grunnar, jf. universitets- og høyskoleloven § 2-3 tredje ledd. Unntak kan vere varige, til dømes der dei faglege grunnane knyter seg til innhaldet i faget. Dette kan vere at studiet inneber opplæring i framandspråk eller primært rettar seg mot internasjonale studentar. Unntak kan også vere mellombelse, til dømes dersom det ikkje er tilgang på norskspråklege undervisarar med den naudsynte fagkompetansen.
(2) Dersom faglege grunnar tilseier det, kan dekan fastsetje at undervisningsspråket i heile eller delar av eit emne skal vere engelsk eller eit anna skandinavisk språk enn norsk. Dersom undervisningsspråket ikkje er norsk, skal det informerast om det så tidleg som mogeleg.

§ 8-7. Arbeidsomfang

(1) Tal på studiepoeng skal gi uttrykk for arbeidsomfanget i studiet. Eitt års heiltidsstudium svarar til 60 studiepoeng.
(2) Til grunn for emnestorleiken skal det reknast eit arbeidsomfang for studenten på 1 600–1 800 timar per studieår.

Kapittel 9. Vurdering

§ 9-1. Vurdering og eksamen

(1) Vurdering omfattar all formell prøving, både vurdering undervegs og til slutt i eit emne. Vurderingsforma i eit emne går fram av emneplanen.
(2) Vurdering er individuell. Dersom vurderingsforma kan eller skal haldast som gruppevurdering må dette stå i emneplanen.
(3) Eksamen er prøving der resultatet anten vil stå på vitnemålet/karakterutskrifta eller skal reknast inn i ein samla karakter som skal stå på vitnemålet/karakterutskrifta.

§ 9-2. Vurderingsformer

(1) Det skal gå fram av emneplanen kva vurderingsformer emnet har. Dersom det er fleire vurderingsdelar innanfor eit emne, er dette deleksamenar. Når eit emne har deleksamenar, skal emneplanen synleggjere dei ulike deleksamenane, og korleis deleksamenane blir vekta i den endelege karakteren.
(2) Individuell prøving skal utgjere minst 50 prosent av vurderingane i det einskilde studieprogrammet. Masteroppgåva blir halden utanfor denne utrekninga.
(3) Det skal gå fram av emneplanen kva som er lovleg hjelpemiddel til eksamen.
(4) Studieprogrammet skal ha vurderingsformer som er eigna for å vurdere om læringsutbyttet i emnet er oppnådd, og som er tilpassa studieprogrammet sitt innhald og læringsaktivitetar. Det blir nytta følgjande vurderingsformer ved Høgskulen på Vestlandet:
Skuleeksamen Eksamen arrangert i eksamenslokale under tilsyn, med fastsett tid for utlevering av oppgåve og innleveringsfrist. Eksamen kan bli gjennomført på datamaskin eller på papir og kan vere eit skriftleg eller digitalt arbeid. Tal timar skal gå fram av emneplanen. Etterprøvbar
Heimeeksamen Eksamen arrangert utan tilsyn, med fastsett tid for utlevering av oppgåve og innleveringsfrist. Varigheita på eksamen skal gå fram av emneplanen. Ein eksamensdag svarar til ein kalenderdag, uavhengig av timetalet studenten arbeider den aktuelle dagen. Perioden for heimeeksamen kan inkludere andre dagar enn kvardagar, jf. § 1-2 (14). Heimeeksamen kan vere eit skriftleg arbeid, lyd- og videoopptak, visuelle framstillingar, produkt, dataprogram eller anna arbeid som er etterprøvbart. Det er ikkje høve til å levere forbetra versjon av heimeeksamen og det skal lagast ny oppgåvetekst til ny heimeeksamen. Det skal ikkje være undervisning eller andre eksamenar medan heimeeksamen går føre seg. I særlege tilfelle kan det gjerast unntak frå dette. Etterprøvbar
Oppgåve Ei skriftleg innlevering. Døme på oppgåve kan vere prosjektoppgåve, rapport, essay, artikkel, semesteroppgåve, bacheloroppgåve eller masteroppgåve. Som vedlegg til oppgåva kan studenten levere lyd- og videoopptak, visuelle framstillingar, produkt, dataprogram eller anna arbeid som er etterprøvbart. Studentane sitt sjølvstendige arbeid i høgare grad, samt bacheloroppgåve og liknande sjølvstendig arbeid på lågare grad blir sensurerte av minst to sensorar når arbeidet er eksamen. Etterprøvbar
Mappevurdering Vurderingsform med rettleiing undervegs der karakteren blir fastsett på grunnlag av innleveringar eller andre produkt som blir samla i ei mappe. Innhaldet kan samlast over tid og må vere fullført til fastsett frist. Berre skriftlege arbeid, lyd- og videoopptak, visuelle framstillingar, produkt, dataprogram eller anna arbeid som er etterprøvbart, kan inngå i ei mappe. Mappa skal dokumentere ei kontinuerleg fagleg utvikling over tid hjå studenten. Prosess, refleksjon kring utval av arbeid og progresjon i arbeidet kan vere ein del av vurderinga. Mappevurdering kan byggjast opp som ei samla mappevurdering eller delast i ei læringsmappe med påfølgjande vurderingsmappe:
a. Læringsmappe er ei samling tekstar og/eller anna arbeid som er produsert gjennom ein viss periode. Samlinga dokumenterer prosess og/eller produkt, og skal vise studenten sine faglege refleksjonar og utviklinga i kompetanse. Arbeid som blir levert i læringsmappa kan vere obligatoriske læringsaktivitetar i emnet.
b. Vurderingsmappe er eit utval av element frå læringsmappa som dannar grunnlag for fastsetjing av karakter. Det skal gå fram i emneplanen kva for og kor mange element frå læringsmappa som inngår, og korleis utvalet blir gjort. Vurderingsmappa får ein samla karakter.
c. Skriftleg prøve kan ikkje vere del av mappe, men skal vere ein eigen deleksamen.
d. Dersom studenten klagar på karakteren må heile vurderingsmappa sendast til ny sensur. Ordning for ny eksamen skal gå fram av emneplanen.		 Etterprøvbar
Munnleg eksamen Eksamen der studenten eller studentane blir eksaminerte munnleg. Varigheita på eksamen skal gå fram av emneplanen. Munnleg eksamen kan vere fysisk eller digital. Studenten/-ane blir eksaminerte av minst to sensorar. Ikkje etterprøvbar
Praktisk eksamen Vurderingsform der studentar skal løyse praktiske oppgåver og bli prøvd i ferdigheiter i emnet. Det kan vere utøvande aktivitetar, som til dømes framvising av eit undervisningsopplegg, ei utstilling, ein konsert, eller behandling av pasientar. Eksamen kan inkludere element av skriftleg og/eller munnleg eksaminasjon. Varigheita på eksamen skal gå fram av emneplanen. Studenten/-ane blir eksaminerte av minst to sensorar. Ikkje etterprøvbar
Praksis Ein rettleidd og vurdert del av utdanninga som går føre seg i eit relevant yrkesfelt. Praksis følgjer reglane i kapittel 10 og eventuell nasjonal forskrift om rammeplan for utdanningsprogrammet. Studenten/-ane blir vurderte av minst to sensorar når praksis er eksamen. Ikkje etterprøvbar

§ 9-3. Justerande munnleg eksamen

Justerande munnleg eksamen kan berre nyttast saman med eit føregåande bestått skriftleg eller utøvande arbeid. Justerande munnleg eksamen kan ikkje gjennomførast før karakter i det føregåande skriftlege eller utøvande arbeidet er protokollført. Studenten skal prøvast i tema som er behandla i det føregåande skriftlege eller utøvande arbeidet og karakteren kan maksimalt justerast med ein karakter opp eller ned i høve karakteren på det skriftlege eller utøvande arbeidet. Justerande munnleg eksamen kan justere karakteren på bestått resultat opp eller ned med maksimalt ein karakter. Ved klage på emne med justerande munnleg eksamen, gjeld eigne reglar, jf. § 13-13 (4).

Kapittel 10. Praksis

§ 10-1. Vilkår for å gå ut i praksis

Det skal gå fram av studie- eller emneplan kva emne, eksamenar eller obligatoriske læringsaktivitetar som skal vere fullført før praksisperioden startar.

§ 10-2. Særlege krav til studentar i praksis

(2) Når det er andre særlege reglar for visse typar yrkesutøving, gjeld desse tilsvarande for studentar som deltek i praksisopplæring eller klinisk undervisning. Særreglar skal gå fram av studieplanen.

§ 10-3. Politiattest

(2) Studenten får ikkje delta i praksis før politiattest utan merknad er lagt fram. Ved politiattest med merknad gjeld § 10-4.

§ 10-4. Politiattest med merknad

(1) Når ein student legg fram politiattest med merknad, skal høgskulen si nemnd for studentsaker avgjere om studenten kan delta i praksis, jf. universitets- og høyskoleloven § 12-2 fjerde ledd. Høgskulen skal gi studenten informasjon om kva dokumentasjon som bør leggast fram før det blir gjort vedtak i nemnda. Høgskulen skal òg gi informasjon om retten studenten har etter universitets- og høyskoleloven § 12-9 til å få dekka utgifter til bistand frå representant etter sak er reist for nemnda.
(2) Etter at studenten har lagt fram dokumentasjon som ligg til grunn for eventuelle merknader, skal dekanen seinast innan ti dagar etter at all dokumentasjon ligg føre, sende over saka med vurdering til høgskulen si nemnd for studentsaker. Nemnda skal gjere vedtak seinast fire veker etter at saka er mottatt frå dekanen, jf. universitets- og høyskoleloven § 12-2.
(3) Studenten skal medverke til å opplyse saka ved å leggje fram dokumentasjon som ligg til grunn for eventuelle merknader på politiattesten, jf. forskrift til universitets- og høyskoleloven § 6-5. Studenten bør leggje fram sikting, tiltale eller dom som ligg til grunn for merknad på politiattesten. Studenten bør òg leggje fram anna dokumentasjon som til dømes eige fråsegn, arbeidsattest og eventuell attest frå lege der det er aktuelt.

§ 10-5. Vurdering av praksis

(1) Det kan gjennomførast obligatoriske læringsaktivitetar knytt til praksisgjennomføringa undervegs i praksis. Desse må vere godkjent før sluttvurdering. Obligatoriske læringsaktivitetar skal følgje reglane i kapittel 8, i tillegg til § 10-1 til § 10-4.
(2) Praksis blir vurdert etter skalaen «bestått» / «ikkje bestått» etter ei avsluttande vurdering av studenten sin prestasjon i praksisperioden. For å bestå praksisen må studenten med sin prestasjon i praksisperioden, nå måla for læringsutbyttet. Når deltaking i praksis er ein obligatorisk læringsaktivitet, skal perioden vurderast som godkjend / ikkje godkjend.
(3) Studenten har rett til jamleg rettleiing og tilbakemelding. Tilbakemeldinga skal halde studenten orientert om korleis studenten fungerer når det gjeld læringsutbyttet for praksisperioden.
(4) Studenten skal få ei sluttvurdering som viser om vurderingsresultatet er bestått eller ikkje bestått. Vurderinga skal omtale kva som er vurdert og om læringsutbytta for praksisperioden er oppnådd. Vurderinga skal gjerast ut frå om krava til læringsutbytta er oppnådd undervegs i praksisperioden. Heile praksisperioden skal telje med i vurderinga. Sluttvurderinga skal vere tilgjengeleg for studenten når resultatet for praksisen er publisert.

§ 10-6. Oppmøte i praksis

Kravet om oppmøte skal gå fram av studieplanen eller emneplanen. Krav om oppmøte kan ikkje fråvikast på grunn av ugyldig, gyldig fråvær eller tilrettelegging etter kapittel 7. Når kravet til oppmøte ikkje er oppfylt, blir praksisen vurdert til ikkje bestått, med unntak for gyldig fråvær etter § 10-11.

§ 10-7. Ved tvil om studenten består praksis

(1) Når det oppstår tvil om studenten vil nå måla for læringsutbyttet og bestå praksis, og tvilen oppstår før studenten er halvvegs i praksisperioden, skal studenten få skriftleg varsel og tilbod om oppfølgjande samtale med praksisstaden og høgskulen. Varsel og samtale om varselet skal gjennomførast på eit tidspunkt som gjev studenten høve til å utvikle tilfredsstillande praksis, og seinast tre veker før praksisperioden er slutt. Ved praksisperiodar på fem veker eller mindre skal varsel og samtale bli gitt halvvegs i perioden.
(2) Varselet skal presisere kva delar av læringsutbytte studenten står i fare for å ikkje oppnå ut frå studenten si utvikling i praksisperioden. I varselet skal det gå fram korleis studenten kan syne oppnådd læringsutbytte for å bestå praksis. Varselet skal òg vise til retten studenten har på tilbod om samtale med praksisstaden og høgskulen, der studenten får svar på spørsmål knytt til varselet og informasjon om konsekvensar av ikkje bestått praksis. Det skal førast referat frå samtalen og studenten har rett til å levere merknad til referatet.

§ 10-8. Ikkje bestått praksis utan varsel på førehand

Studenten kan utan varsel på førehand få prestasjonen vurdert til ikkje bestått når studenten
  1. klart ikkje presterer og oppnår læringsutbyttet som er påkravd for å bestå praksis, og
  2. den manglande prestasjonen blir tydeleg etter at halve praksisperioden er gjennomført, eller etter tidspunktet varsel normalt blir gitt i den aktuelle praksisen på utdanningsprogrammet.

§ 10-9. Farlege handlingar eller åtferd

(1) Når studenten i praksisperioden har vist handling eller åtferd som utgjer ein mogleg fare for liv, fysisk eller psykisk helse for dei studenten er i kontakt med, skal praksisperioden avsluttast straks utan krav om varsel på førehand. Studenten får i slike tilfelle vurderingsresultatet ikkje bestått.
(2) Praksisstaden skal så raskt som mogleg sende innstilling til avsluttande vurdering til høgskulen. Vurderinga skal gjere greie for handlingane eller åtferda som resulterte i avslutning av praksis og ikkje bestått vurdering.
(3) Høgskulen skal gjennomføre samtale med studenten, der det blir informert om grunnlaget for at praksis er avslutta og konsekvensane dette har for studenten.
(4) Studenten skal få skriftleg vedtak om at praksis er avslutta.
(5) Høgskulen og praksisstaden skal vurdere om det er grunnlag for å sende tvilsmelding til institusjonsansvarleg for skikkavurdering når studenten går på eit utdanningsprogram med skikkavurdering.

§ 10-10. Konsekvensar av ikkje bestått praksis eller gyldig fråvær

(1) Når studenten får praksisen vurdert til ikkje bestått på grunn av ugyldig fråvær eller ikkje bestått praksis, må heile praksisperioden takast om att. Studenten må i slike tilfelle gjennomføre ny praksisperiode neste gong denne blir arrangert ordinært. Dette kan få konsekvensar for studenten sin studieprogresjon.
(2) Når studenten har gyldig fråvær kan høgskulen tilrettelegge for at studenten får ny eller utsett delar av praksisperioden innanfor same studieår eller neste studieår. Tilrettelegging skal ikkje senke dei faglege krava til praksisen, jf. § 7-2. Sjølv om fråværet er gyldig, kan forseinkinga få konsekvensar for studenten sin studieprogresjon.

§ 10-11. Gyldig fråvær frå praksis

(1) Gyldig fråvær senkar ikkje kravet til oppmøte, jf. § 10-6. Ved gyldig fråvær har høgskulen plikt til å vurdere om det er mogleg å forlenge praksisperioden. Høgskulen avgjer i kvart enkelt tilfelle kva som er gyldig fråvær. Døme på gyldig fråvær er:
  1. eigen sjukdom og barn sin sjukdom
  2. dødsfall i nær familie eller hos andre studenten har eit nært forhold til
  3. gravferd eller bisetjing, jf. førre punkt
  4. pålegg frå offentleg mynde om at studenten pliktar å møte fram ein annan stad
  5. studentar med verv i Studenttinget skal få gyldig fråvær ved møteplikt
  6. forhold utanfor studenten sin kontroll som gjer det sterkt urimeleg å krevje at studenten gjennomfører ein eller fleire dagar av praksisperioden.
(2) Krav til dokumentasjon av gyldig fråvær:
  1. Sjukdom kan dokumenterast med ein attest frå lege, psykolog eller annan sakkunnig person, eller ved at studenten leverer eigenmelding. Attesten eller eigenmeldinga må opplyse om at den er skriven i samband med fråvær frå praksis arrangert av Høgskulen på Vestlandet, og at fråværet gjeld ein bestemt dag eller dagar. Når studenten sin praksisperiode har starta må attest frå lege, psykolog eller annan sakkunnig person, eller eigenmelding, vere skriven og sendt til høgskulen seinast éi veke etter sjukdommen oppstod. Studenten må gi snarleg melding om fråvær til høgskulen og til praksisstaden om praksis har starta. Sjå § 11-8 om tidsfristar og krav til dokumentasjon.
  2. Ved dødsfall, gravferd eller bisetjing må studenten oppgje kven som har gått bort og kva for relasjon studenten hadde til avdøde.
  3. Andre omstende som blir rekna som gyldig fråvær må dokumenterast.

§ 10-12. Talet på forsøk i praksis

(1) Studenten har rett på to forsøk på same praksisperiode i eit emne.
(2) Det er ikkje brukt eitt forsøk på praksis når studenten har gyldig fråvær eller har trekt seg frå praksisen to veker før første praksisdag, jf. § 11-7 (1) bokstav d.
(3) Studenten kan søke om å få dispensasjon til ein tredje praksisperiode, dersom det ligg føre særlege grunnar. Særlege grunnar er særs viktige sosiale eller medisinske grunnar til at eitt eller begge dei tidlegare forsøka ikkje er bestått. Grunnane må vere dokumentert med attest frå lege, psykolog eller annan sakkunnig person. Studenten sin studieprogresjon og faglege prestasjonar skal òg telje med i vurderinga av søknaden. Studenten må grunngje kvifor forsøka i praksis ikkje er bestått tidlegare.

§ 10-13. Tvilsmelding ved løpande skikkavurdering

Ved ikkje bestått praksis skal høgskulen og praksisstaden vurdere om det er grunnlag for å sende tvilsmelding til institusjonsansvarleg for skikkavurdering når studenten går på eit studieprogram underlagt skikkavurdering, jf. universitets- og høyskoleloven § 12-3 andre ledd.

Kapittel 11. Eksamen

§ 11-1. Eksamensstad

(1) Eksamenar som krev fysisk oppmøte skal gjennomførast på studiestaden der studenten er tatt opp. Høgskulen kan gjere unntak i særlege tilhøve, jf. kapittel 7 om tilrettelegging.
(2) Oversikt over eksamensstad skal vere tilgjengeleg på Studentweb seinast ei veke før kvar eksamen.
(3) Det kan gjelde eigne reglar for praktisk eksamen. Det kan òg gjelde eigne reglar for studietilbod med studiesamlingar utanfor campus, når vurderingsform ikkje er skuleeksamen. Eigne reglar skal gå fram av studieplan eller emneplan.

§ 11-2. Tidspunkt for eksamen. Eksamensplan

(1) Dato for eksamen skal leggast til ein kvardag, jf. § 1-2 (14). I særlege tilfelle kan eksamen arrangerast på ein annan dag enn kvardag.
(2) Tidspunktet for kvar enkelt eksamen blir kunngjort på Studentweb. Dato for ordinær skuleeksamen skal vere kunngjort innan 15. august og 15. januar. Tidsrom for avvikling av andre vurderingsformer blir kunngjort i Studentweb seinast to veker før aktuell eksamen. Endringar på dato for ordinær eksamen etter fristen for oppmelding til eksamen kan berre gjerast når det ligg føre særleg tungtvegande grunnar.
(3) Eksamensplanen blir laga med utgangspunkt i ordinær studieprogresjon for kullet. Høgskulen er difor ikkje ansvarleg for kollisjonar mellom eksamenar for studentar som vel eit anna studieløp enn det ordinære eller for studentar som har fleire studierettar.
(4) Studentar som følgjer ordinært studieløp og skal avleggje ordinær eksamen, har rett til minimum ein lesedag mellom kvar eksamensdag. Det er ikkje krav om at lesedag er ein kvardag. I særlege tilfelle kan det vere unntak.
(5) Det kan gjelde eigne reglar for praktisk eksamen. Det kan òg gjelde eigne reglar for studietilbod med studiesamlingar utanfor campus, når vurderingsform ikkje er skuleeksamen. Eigne reglar skal gå fram av studieplan eller emneplan.

§ 11-3. Vilkår for å gå opp til eksamen

(1) Studenten må ha fullført semesterregistrering for å kunne gå opp til eksamen, jf. § 4-2.
(2) Studenten må ha bestått forkunnskapskrav for emnet. Forkunnskapskrav som må vere bestått for å melde seg opp i emnet skal gå fram av emneplanen.
(3) Obligatoriske læringsaktivitetar i emnet må vere godkjent for at studenten skal kunne gå opp til eksamen.
(4) For studentar på studieprogram eller emne med deltakaravgift, må deltakaravgifta vere betalt før vurderingsmeldinga er gyldig.

§ 11-4. Oppmelding til eksamen

(1) Studentar melder seg opp til eksamen via Studentweb. Frist for oppmelding til eksamen er 1. februar i vårsemesteret og 1. september i haustsemesteret, jf. § 4-2 (1). For vidareutdanningar, utdanningar med studieavgift og oppdragsbaserte utdanningar med oppstart etter semesterregistreringsfristen 1. september i haustsemesteret og 1. februar i vårsemesteret, er fristen seinast 14 dagar etter oppstart.
(2) Studentar har sjølve ansvaret for å kontrollere at dei er meldt opp til rett eksamen og korrigere eventuelle feil eller sørgje for at desse blir retta innan fristen for oppmelding.
(3) I særlege tilfelle kan det dispenserast frå fristen for oppmelding til eksamen.
(4) Studentar må òg sjølve melde seg opp til ny eksamen eller sikre at dei blir meldt opp innan fristen. For rett til oppmelding til ny eksamen og eksamen i utgått emne sjå § 11-10 til § 11-12.

§ 11-5. Eksamensforsøk

(1) Det er ikkje høve til å framstille seg til eksamen i same emne meir enn tre gonger ved Høgskulen på Vestlandet. Eksamensforsøk i praksis går fram av reglane i kapittel 10.
(2) Emne med tilsvarande fagleg innhald, blir rekna som same emne. Fagleg overlapp mellom emne skal gå fram av emneplanen, jf. § 2-9.
(3) Studentar utan bestått resultat i eit emne får etter søknad eit fjerde eksamensforsøk dersom eit av følgjande vilkår er oppfylte:
  1. studenten manglar maksimalt 60 studiepoeng for å fullføre sin grad, eller yrkesutdanning, eller
  2. emnet er obligatorisk i programmet eller forkunnskapskrav for eitt eller fleire obligatoriske emne i graden, eller
  3. særs tyngande sosiale eller medisinske tilhøve ligg til grunn for at eitt eller fleire av dei tidlegare forsøka ikkje er bestått. Søknaden må vere dokumentert med attest frå lege, psykolog eller annan sakkunnig person. Studenten sin tilstand på eksamenstidspunktet og studenten sin sjanse til å gjennomføre, trekkje seg eller sjukmelde seg frå eksamenen skal gå fram av dokumentasjonen. Studenten sin studieprogresjon og faglege prestasjonar kan telje med i vurderinga av søknaden.
(4) Det kan stillast krav om at studenten må følgje undervisningsopplegget og gjennomføre eventuelle obligatoriske læringsaktivitetar på nytt.

§ 11-6. Teljande eksamensforsøk

(1) Med teljande eksamensforsøk meiner ein at studenten:
  1. har bestått eksamen
  2. trekk seg etter fristen, jf. § 11-7
  3. ikkje møter til eksamen eller eksterne sertifikatkurs, utan dokumentert gyldig fråvær, jf. § 11-8
  4. ikkje leverer heimeeksamen, oppgåve eller mappe, utan dokumentert gyldig fråvær, jf. § 11-8
  5. får karakteren F / ikkje bestått
  6. får eksamen annullert på grunn av fusk eller forsøk på fusk.
(2) Der utdanninga tilbyr gjennomføring av eksterne sertifikatkurs, som må vere bestått for å kunne utøve yrket, står høgskulen berre ansvarleg for kostnader og gjennomføring av eitt ordinært forsøk. Vidare forsøk må studenten syte for på eige initiativ. Dersom studenten ikkje møter på oppsett kurs eller ikkje består kurset, tel dette som eit ordinært forsøk.

§ 11-7. Trekk frå eksamen

(1) Studenten kan sjølv trekkje seg frå eksamen i Studentweb. Studenten har sjølv ansvaret for å trekkje seg frå eksamen/praksis dersom denne ikkje skal gjennomførast. Trekk innan fristen vil ikkje telje som eitt eksamensforsøk. Fristen for å trekkje seg frå eksamen er:
  1. To veker før eksamen tar til for skuleeksamen og heimeeksamen
  2. To veker før siste innleveringsfrist for oppgåver og mappevurdering
  3. To veker før første eksaminasjonsdag for munnleg og praktisk eksamen
  4. To veker før første praksisdag for praksis.
(2) Studentar kan berre trekke seg under eksamen på grunn av sjukdom og må dokumentere dette for å få registrert gyldig fråvær.

§ 11-8. Gyldig fråvær til eksamen

(1) Studentar som ikkje møter til eksamen dei er meldt opp til, men kan dokumentere gyldig fråvær, blir rekna som ikkje å ha framstilt seg til eksamen og har ikkje brukt eitt eksamensforsøk. Gyldig fråvær er:
  1. eigen sjukdom og barns sjukdom
  2. dødsfall i nær familie eller andre nærståande til studenten
  3. gravferd eller bisetting til nærståande, jf. førre punkt
  4. pålegg frå offentleg mynde om at studenten pliktar å møte fram ein annan stad
  5. forhold utanfor studenten sin kontroll som gjer det sterkt urimeleg å krevje at studenten gjennomfører ein eksamen.
(2) Krav til dokumentasjon av gyldig fråvær frå eksamen:
  1. Sjukdom må dokumenterast med attest frå lege, psykolog eller annan sakkunnig person. Attesten må opplyse om at den er gitt i høve fråvær frå eksamen arrangert av Høgskulen på Vestlandet, og at fråværet gjeld ein bestemt dag eller dagar.
  2. Ved dødsfall, gravferd eller bisetting må studenten oppgje kven som har gått bort, og kva for relasjon studenten hadde til avdøde.
  3. Andre omstende som blir rekna som gyldig fråvær må dokumenterast.
  4. Dokumentasjonen skal vere gitt til høgskulen, eller poststempla seinast ei veke etter at eksamen skulle ha vore avlagt eller etter frist for innlevering av skriftleg arbeid.
(3) Dersom eit eksamenssvar er innlevert, kan det ikkje registrerast gyldig fråvær i ettertid.

§ 11-9. Ordinær eksamen

(1) Ordinær eksamen skal gjennomførast med den vurderingsforma som går fram av emneplanen og i det semesteret som er vist i studieplanen.
(2) Dersom ein student framstiller seg til ordinær eksamen på nytt, er det pensumet, vurderingsforma og eventuelle obligatoriske læringsaktivitetane som er fastsette for den nye eksamensavviklinga som gjeld.

§ 11-10. Ny eksamen (kontinuasjonseksamen)

(1) Studentar som har gyldig fråvær frå ordinær eksamen eller har stroke på ordinær eksamen har rett på ny eksamen. Ein student som på grunn av utvekslingsopphald i regi av Høgskulen på Vestlandet ikkje har kunna gå opp til ordinær eksamen, kan etter søknad få rett til ny eksamen.
(2) Når det blir arrangert ny eksamen for studentar etter første ledd, kan òg andre studentar med gyldige obligatoriske læringsaktivitetar i emnet, melde seg opp til ny eksamen.
(3) Ny eksamen skal gjennomførast med same pensum som ved siste ordinære eksamen. Så langt det er praktisk mogeleg skal eksamen gjennomførast med same vurderingsform som ved siste ordinære eksamen.
(4) Når ein student har avlagt ny eksamen gjeld den beste karakteren.
(5) Tidspunkt for avvikling av ny eksamen blir kunngjort på Studentweb seinast to veker før aktuell eksamen.
(6) Vanlegvis blir ny eksamen arrangert ved utgangen av påfølgjande semester. Det kan ikkje bli arrangert meir enn éin ny eksamen i eitt og same emne i same semester. I særlege tilfelle kan dekan sjølv gjere unntak frå denne regelen. Ved utdanningar der bestått eksamen er ein føresetnad for oppflytting til neste semester eller studieår, kan ny eksamen bli arrangert før eller i samband med oppstart av nytt semester eller studieår. Det kan likevel ikkje bli arrangert meir enn éin ny eksamen i eit emne mellom kvar ordinære eksamen ved desse utdanningane.
(7) Ny eksamen der vurderingsforma er praksis er regulert i kapittel 10.
(8) Rett til ny eksamen kan bli avgrensa til studentar utan bestått eksamen dersom eksamen er særs ressurskrevjande.

§ 11-11. Rett til utsett eksamen ved fødsel

(2) Far, medfar, medmor og foster- og adoptivforeldre har rett til utsett eksamen dersom eksamensdatoen er i perioden to veker etter fødsel eller omsorgsovertaking.

§ 11-12. Eksamen i utgått emne

(1) Eit emne utgår når tilhøyrande emnekode ikkje lenger skal brukast.
(2) Når eit emne utgår og siste ordinære eksamen er gitt, skal det bli arrangert inntil to eksamenar i dei to påfølgjande semestera for studentar som ikkje har bestått resultat. Dersom ny eksamen blir arrangert, blir den rekna som ein av dei to eksamenane som skal arrangerast.
(3) Når det blir arrangert eksamen i utgått emne for studentar etter andre ledd, kan òg andre studentar med gyldige obligatoriske læringsaktivitetar i emnet melde seg opp til eksamen.
(4) Studentar som oppfyller vilkåra for å gå opp til eksamen i utgått emne må vurderingsmelde seg i Studentweb innan 1. september eller 1. februar.
(5) For rammeplanstyrte utdanningar kan det gjelde andre reglar.

§ 11-13. Vurderingsstart

(1) Skuleeksamen startar straks eksamensoppgåva er utlevert.
(2) Heimeeksamen startar når eksamensoppgåva er tilgjengeleg i eksamenssystemet.
(3) Mappevurdering startar ved innleveringsfristen for det første av arbeida som går inn i vurderinga. Dette gjeld òg om det i emneplanen er fastsett at studenten sjølv kan velje kva for eit av arbeida som skal danne grunnlag for karakteren.
(4) Oppgåve startar når retningslinjer for oppgåva er gitt.
(5) Munnleg eller praktisk eksamen startar når studenten tar til med eventuell førebuing, elles når eksaminasjonen startar.

§ 11-14. Skuleeksamen

(1) Studenten skal disponere eigen berbar datamaskin til eksamen, jf. forskrift til universitets- og høyskoleloven § 4-7 tredje ledd. Ved skuleeksamen som er basert på bruk av eiga berbar datamaskin, er studentane sjølve ansvarlege for eige utstyr og for å ha lasta ned nødvendig programvare for å kunne gjennomføre eksamen før dei møter i eksamenslokalet, jf. § 8-6.
(2) Det skal gå fram av emneplanen kva for hjelpemiddel som er tillatne ved dei ulike eksamenane. Vidare skal det òg gå klart fram av oppgåveteksten kva for hjelpemiddel som er tillatne. Dersom andre hjelpemiddel enn det som er tillate blir funne, vil det bli inndratt og eventuelt bli handtert som fusk eller forsøk på fusk.
(3) Emneansvarleg, eller vikar for denne, skal vere fysisk til stades eller tilgjengeleg på annan måte.
(4) Ved gjennomføring av skuleeksamen gjeld følgjande:
  1. I eksamenslokalet skal studenten rette seg etter tilvising frå eksamensvaktene.
  2. Studenten skal møte i eksamenslokalet seinast 20 minutt før eksamen startar. Studentar som kjem for seint, får berre tilgjenge til eksamen i løpet av den første timen etter at eksamen har starta.
  3. Ingen studentar får forlate eksamenslokalet den første timen etter at eksamen har starta.
  4. Studenten skal vise gyldig legitimasjon med bilete til eksamensvakt og stadfeste frammøte. Studentkort og studentbevis er ikkje rekna som gyldig legitimasjon.
  5. Det er berre tillate å ha lovlege hjelpemiddel, gyldig legitimasjon, skrivesaker, mat og drikke ved pulten under eksamen. Jakker, sekkar, vesker og liknande skal settast på tilvist stad. Mobiltelefon, hovudtelefonar, klokke/smartklokke og anna elektronisk utstyr som ikkje skal brukast under eksamen, skal vere avslått og pakka ned, og skal ikkje oppbevarast i lommer eller ved pulten.
  6. Det er ikkje tillate å skrive på utdelt papir før eksamensoppgåvene er delte ut. Det er ikkje tillate å bruke anna papir enn det som er delt ut.
  7. Kommunikasjon mellom studentane, eller med andre personar utanom emneansvarleg/vikar og eksamensvakter, under eksamen er ikkje tillate.
  8. Studenten kan skrive fram til eksamenstida er ute. Det er studenten sitt ansvar å sørgje for at innleveringa er komplett.
  9. Kladdeark kan ikkje leverast inn som ein del av eksamenssvaret.
  10. Etter at eksamenssvaret, overflødig eksamenspapir og alle kladdeark er levert, skal studenten forlate eksamenslokalet. Innlevert eksamenssvar blir ikkje under noko omstende levert tilbake til studenten.

§ 11-15. Munnleg, justerande munnleg og praktisk eksamen

(1) Sensorane i fellesskap er ansvarlege for planlegging og gjennomføring av munnleg, justerande munnleg og praktisk eksamen.
(2) Dersom studenten blir forseinka, skal forseinkinga trekkjast frå eksamenstida. Ved meir enn ti minutt forseinking til munnleg, justerande munnleg eller praktisk eksamen, skal sensor registrere ikkje møtt.
(3) Dersom studenten ikkje møter til munnleg, justerande munnleg eller praktisk eksamen skal dette registrerast i vurderingsprotokollen. Ved manglande frammøte til justerande munnleg eksamen utan dokumentert gyldig fråvær, blir dette rekna som at studenten ikkje har møtt til eksamen og har brukt eit forsøk.
(4) Justerande munnleg blir gjennomført i tråd med § 9-3. Dersom sensor under justerande munnleg eksamen mistenker at studenten ikkje har skrive oppgåva sjølv, skal saka handsamast som ei mogleg fuskesak.
(5) Ved forbetring av karakter i emne med justerande munnleg må heile eksamen tas på ny. Dersom skriftleg arbeid ligg til grunn for justerande munnleg, kan ikkje studenten levere same eller omarbeidd oppgåve.

§ 11-16. Heimeeksamen, mappevurdering og oppgåver

(1) Heimeeksamen, mappevurdering og oppgåver der innleveringa er skriftleg skal gjennomførast og leverast digitalt. Det er studenten sitt ansvar å sørgje for at innleveringa er komplett.
(2) Ein student som ikkje leverer eksamenssvaret eller dokumenterer gyldig fråvær innan fristen, blir registrert som ikkje møtt i vurderingsprotokollen. Dette tel som eitt eksamensforsøk.

§ 11-17. Gruppeeksamen

(1) Ved gruppeeksamen skal alle deltakarane i gruppa bidra til eit felles produkt. Karakteren på produktet skal vere lik for heile gruppa. Oppstår det tvil om ein student bidreg eller har bidrege tilstrekkeleg til å få utteljing for eit felles produkt skal det hentast inn skriftleg individuell fråsegn frå alle gruppemedlemene og fagleg rettleiar eller emneansvarleg. Høgskulen kan gjere vedtak om at studenten skal reknast for ikkje å ha møtt under eksamen.
(2) Ved innlevering av gruppeeksamen må alle studentane i gruppa godkjenne at gruppeleiar leverer eksamensoppgåva på vegne av heile gruppa. Dette skjer når ein aksepterer gruppeinvitasjonen i eksamenssystemet. For bachelor- og masteroppgåver gjeld godkjenninga for heile gruppa òg dersom gruppeleiar godkjenner avtalen om publisering i høgskulen sitt vitenarkiv.
(3) Heile gruppa har ansvar for å sørgje for at innleveringa er komplett. Om innleveringa ikkje er i tråd med kjeldereglar og retningslinjer for eksamen, kan alle gruppedeltakarane bli mistenkt for fusk etter kapittel 12.
(4) Bestått gruppeeksamen kan ikkje forbetrast.
(5) Når munnleg, justerande munnleg og praktisk eksamen blir gjennomført i gruppe, skal sensorane sørgje for at alle studentane i gruppa blir eksaminerte i eit omfang som gir tilstrekkeleg grunnlag for karaktersetjinga.
(6) Dersom minst ein student har gyldig fråvær eller minst ei av gruppene ikkje består eksamen, blir ny eksamen arrangert. Dersom berre ein student med gyldig fråvær melder seg opp, kan studenten ta individuell eksamen med mindre anna går fram av emneplanen.

§ 11-18. Bachelor- og masteroppgåve

(1) Alle bachelor- og masterstudentar skal inngå ein rettleiingsavtale.
(2) Fakultetet fastset fristar for innlevering av bachelor- og masteroppgåve.
(3) Fakultetet skal utarbeide eigen rettleiar for bachelor- og masteroppgåva.
(4) Studentar som ikkje leverer bachelor- eller masteroppgåve til ordinær frist, kan trekke seg frå eksamen eller søke om utvida tid, jf. § 11-7 (1) og § 7-4 (5).
(5) Det er studenten sitt ansvar å sørgje for at innleveringa er komplett.
(6) Dersom bachelor- eller masteroppgåva er skrivne i ei gruppe gjeld reglane for gruppeeksamen i § 11-17.

§ 11-19a. Oppattaking av bachelor- og masteroppgåve

(1) Ein student som har fått bachelor- eller masteroppgåva si vurdert til ikkje bestått, kan levere forbetra versjon til sensur i løpet av dei to påfølgjande semestera. Ved særs tyngande sosiale eller medisinske tilhøve kan studenten søke fakultetet om å levere forbetra versjon etter dei to påfølgande semestera. Krav til dokumentasjon etter § 11-5 (3) bokstav c gjeld tilsvarande. Det er berre mogleg å levere forbetra versjon éin gong.
(2) Det er ikkje høve til å forbetre karakter på ei bestått bachelor- eller masteroppgåve innafor same studieprogram. Det kan gjerast unntak viss studenten skriv heilt ny oppgåve med ny problemstilling.
(3) Ved innlevering av ny eller forbetra versjon av bachelor- eller masteroppgåve, kan rettleiinga til studenten bli avgrensa.

§ 11-19b. Oppattaking av andre oppgåver

Studenten har rett til å levere forbetra versjon av ikkje bestått eller bestått oppgåve dersom det står i emneplanen. Forbetra versjon må leverast til sensur seinast ved utgangen av påfølgjande semester. Det er berre mogleg å levere forbetra versjon éin gong. Studenten har ikkje krav på ny rettleiing.

§ 11-19c. Oppattaking av praksisrelaterte oppgåver på under 10 studiepoeng

Ved ikkje bestått praksisrelaterte oppgåve på under 10 studiepoeng er det høve til å levere forbetra versjon dersom problemstilling ikkje kan endrast utan å gjennomføre praksisperioden på nytt.

§ 11-19d. Oppattaking av mappevurdering

(1) Det kan leverast forbetra versjon av mappevurdering når den ikkje er bestått. Emneplanen kan stille krav til at forbetra versjon berre kan leverast i semester med undervisning i emnet.
(2) Det er berre høve til å levere forbetra versjon av bestått mappevurdering dersom det står i emneplanen. Emneplanen kan stille krav til at forbetra versjon berre kan leverast i semester med undervisning i emnet. Studenten har ikkje krav på ny rettleiing.

§ 11-20. Målform og språk i oppgåvetekstar

(2) Eksamensoppgåver som blir gitt på norsk, skal liggje føre på begge målformer (bokmål og nynorsk). Studentane vel målform i Studentweb. Har alle studentane valt same målform, kan oppgåvene bli gitt i berre denne målforma. Unntaket er oppgåver i faget norsk der målforma er bestemd i emneplanen.
(3) Dersom undervisninga blir gitt på eit anna språk enn norsk, skal eksamensoppgåva bli gitt på undervisningsspråket, med mindre noko anna er fastsett i emneplanen.

§ 11-21. Målform og språk i eksamenssvar

(1) Studenten kan velje målform i eksamenssvaret, med mindre noko anna er fastsett i emneplanen.
(2) Eksamenssvar kan leverast på eit av dei skandinaviske språka som alternativ til norsk, med mindre noko anna er fastsett i emneplanen. Når eksamensoppgåva blir gitt på engelsk, kan studentane levere eksamenssvaret på engelsk.
(3) Bachelor- og masteroppgåver som blir skrivne på norsk, skal ha eit samandrag på engelsk eller eit anna relevant framandspråk som er avtalt med rettleiar. Bachelor- og masteroppgåver som blir skrivne på eit ikkje-skandinavisk språk, skal ha eit kort samandrag på norsk/skandinavisk. Dekan kan gi unntak frå denne avgjerda dersom studenten ikkje meistrar eit av dei skandinaviske språka.

§ 11-22. Anonymitet

Ved vurdering av eksamenssvaret skal anonymiteten til studenten takast i vare så langt det er mogeleg. Dette gjeld òg for bachelor- og masteroppgåver. Ved innlevering og sensur av eksamensarbeid bør kandidatnummer nyttast for å knyte studenten til arbeidet.

Kapittel 12. Fusk

§ 12-1. Fusk og forsøk på fusk

(1) Som fusk reknar ein mellom anna:
  1. å opptre i strid med gjeldande reglar for den spesifikke eksamenen.
  2. å bruke eller ha ulovlege hjelpemiddel tilgjengeleg under eksamen.
  3. å legge fram andre sitt arbeid som sitt eige utan tilstrekkelege kjeldetilvisingar eller markering av sitat (plagiat).
  4. å vise til fiktive kjelder.
  5. å levere arbeid som er heilt eller delvis utarbeidd av andre enn studenten eller studentane sjølv.
  6. å sitere eller på annan måte nytte eigne tidlegare arbeid som har gitt utteljing i form av studiepoeng eller rett til å gå opp til eksamen, utan tilstrekkeleg kjeldetilvising.
  7. å skaffe seg tilgjenge til eksamen ved å fuske på ein obligatorisk læringsaktivitet, eller på urett grunnlag få godkjent deltaking til slik aktivitet.
  8. å tileigne seg fordelar ein ikkje har rett til ved eksamen eller kurs.
  9. ulovleg kommunikasjon mellom studentar eller grupper (ulovleg samarbeid).
  10. å la ein annan gjennomføre eksamen for seg.
  11. fabrikkering eller forfalsking av data.
(2) Studentar kan reknast for å ha fuska eller forsøkt å fuske frå det tidspunktet eksamenen eller vurderinga har starta. For føresegner om når eksamen har byrja, sjå § 11-13.

§ 12-2. Mistanke om fusk

(1) Om det oppstår mistanke om fusk eller forsøk på fusk under obligatoriske læringsaktivitetar eller eksamen, skal høgskulen opplyse studenten om at forholdet vil bli rapportert. Studenten har rett til å fullføre læringsaktiviteten eller eksamenen, men med den risiko at det kan bli reist sak om fusk eller forsøk på fusk, og at slik sak kan føre til at læringsaktiviteten blir underkjent eller at eksamen blir annullert. Valet om å fullføre eller ikkje, verkar ikkje inn på om det blir reist sak om fusk eller forsøk på fusk.
(2) Inntil høgskulen si nemnd for studentsaker har gjort vedtak i saka har studenten rett til å halde fram på studiet som vanleg. Studenten kan likevel bli stoppa av progresjonskrav på utdanninga.

§ 12-3. Konsekvensar av fusk

(1) Forsettleg eller grovt aktlaust fusk, forsettleg forsøk på fusk og forsettleg medverknad til fusk kan føre til annullering av eksamen og kursgodkjenning, og utestenging i inntil to semester frå universitet og høgskular. I særleg grove tilfelle kan studenten stengast ute i inntil fire semester, jf. universitets- og høyskoleloven § 12-4.
(2) Sak om annullering eller utestenging blir avgjort av høgskulen si nemnd for studentsaker.
(4) Ein student som har fått bacheloroppgåva, masteroppgåva eller ei anna oppgåve annullert på grunn av fusk, kan ikkje levere ein forbetra versjon av oppgåva. I særlege tilfelle kan det gjerast unntak frå dette. Høgskulen kan bestemme at studenten må levere ny oppgåve med ny problemstilling.

Kapittel 13. Sensur og klage

§ 13-1. Sensur

Innlevert eksamenssvar kan ikkje haldast unna sensur. Det same gjeld for munnleg eller praktisk eksamen frå tidspunktet eksaminasjonen eller førebuinga har starta, jf. § 11-13.

§ 13-2. Sensurfrist

(2) Ved masteroppgåver er sensurfristen inntil seks veker.

§ 13-3. Oppnemning av sensorar

(1) Dekan oppnemner sensorar etter forslag frå emneansvarleg, for inntil tre år om gongen. Til kvar einskild eksamen skal det opprettast sensorkommisjon til både ordinær sensur og klagesensur før ordinær eksamen tar til. Ekstern sensor som tar imot sensoroppdrag, bør vere sensor ved eventuell ny eksamen i same emne i påfølgjande semester. Dersom sensurfrist for eit avtalt sensoroppdrag fell etter sensorkontrakten sin utløp, blir sensorkontrakten forlenga til honorar for sensoroppdraget er utbetalt.
(2) Ved sensurering av eksamenar i emne som skal inngå på vitnemålet eller karakterutskrift, bør det oppnemnast to sensorar. Det skal vere ein ekstern sensor på minst 1/3 av desse emna, slik at alle emna i løpet av ein tre-årsperiode har hatt ekstern sensur.
(3) Det skal oppnemnast to sensorar i følgjande tilfelle:
  1. Ved sensur av bacheloroppgåve eller liknande sjølvstendig arbeid på lågare grad. Ved sensur av bacheloroppgåve skal minst ein av sensorane vere ekstern. Sensor bør ikkje ha vore rettleiar på bacheloroppgåva.
  2. Ved sensur av eksamenar som ikkje lar seg etterprøve.
  3. Ved eksamenar som åleine utgjer 15 studiepoeng eller meir.
(4) Det skal oppnemnast to sensorar, der minst ein er ekstern, i følgjande tilfelle:
  1. Ved sensur av studentane sitt sjølvstendige arbeid i høgare grad, som til dømes masteroppgåve. Sensor kan ikkje ha vore rettleiar på masteroppgåva.
(5) Ved bruk av ekstern sensor på ordinær eksamen, skal det vere ekstern sensor på påfølgjande ny eksamen.

§ 13-4. Kvalifikasjonskrav for sensorar

(1) Sensor for emne som inngår i bachelorgrad skal minst ha bachelorgrad innanfor relevant fagområde, eller gjennom yrkespraksis vere særleg kvalifisert innan faget.
(2) Sensor for emne som inngår i mastergrad eller vidareutdanning som byggjer på bachelorgrad eller tilsvarande, skal minimum ha mastergrad innanfor relevant fagområde.
(3) Sensor for doktorgradsavhandling ph.d. skal ha førstekompetanse innan relevant fagområde.

§ 13-5. Ekstern sensor

Vilkåra for at ein sensor kan vere ekstern, er at sensoren dei siste 12 månadene ikkje
  1. har vore student eller privatist ved Høgskulen på Vestlandet, eller
  2. har vore tilsett ved Høgskulen på Vestlandet, eller
  3. har fått løn eller vederlag frå Høgskulen på Vestlandet for anna enn sensurarbeid.

§ 13-6. Godkjenning av eksamensoppgåva og sensorrettleiing

(1) Eksamensoppgåvene skal kvalitetssikrast. Studieprogramansvarleg, eller den det blir delegert til, skal godkjenne eksamensoppgåvene. Godkjenninga av eksamensoppgåve betyr at eksamensoppgåva sitt innhald og formulering samsvarar med emnet sitt læringsutbytte i tillegg til at eksamensoppgåva er rettskriven med oppgåvetekst på dei påkravde skriftsspråka.
(2) Det skal utarbeidast ei sensorrettleiing til kvar eksamen, jf. universitets- og høyskoleloven § 11-7 tredje ledd. Dette gjeld for alle vurderingsformer. Sensorrettleiinga skal kvalitetssikrast og godkjennast av studieprogramansvarleg, eller den det blir delegert til.

§ 13-7. Gjennomføring av sensur

(1) Sensorrettleiing og emneplan skal vere gjort tilgjengeleg for sensor. Ekstern sensor/sensorane skal, etter sensurering, skrive sensorrapport.
(2) Ved usemje ved ordinær sensur og klagesensur:
  1. Mellom ekstern og intern sensor avgjer ekstern sensor resultatet.
  2. Mellom to interne sensorar avgjer den sensoren som ikkje har undervisningsansvaret.
  3. Ved usemje på meir enn to karakterar, skal det oppnemnast ein tredje sensor. Tredje sensor kan få tilgang til informasjon om kva usemja gjeld. Det er den tredje sensoren som avgjer den endelege karakteren.
(3) Sensor som avgjer resultat ved usemje har ansvar for eventuell grunngjeving.

§ 13-8. Vesentleg karakteravvik ved klagesensur

Dersom karakteren ved ny sensur etter klage på karakterfastsetting, avvik med to eller fleire karakterar frå opphavleg sensur, skal høgskulen gjennomføre ytterlegare ei vurdering før endeleg karakter blir fastsett, jf. universitets- og høyskoleloven § 11-11 tredje ledd. Ytterlegare vurdering skal gjerast av emneansvarleg, eller den som emneansvarleg delegerer til, saman med ordinær(e) sensor(ar) og klagesensorar. Dersom det er usemje mellom sensorane avgjer emneansvarleg, eller den som emneansvarleg delegerer til, endeleg karakter.

§ 13-9. Karakterskala. Utrekning av endeleg karakter

(1) Vurderingsuttrykk er bestått/ikkje bestått vurdering eller gradert karakter frå A til E for bestått vurdering og F for ikkje bestått vurdering. Universitets- og høgskolerådet sine kvalitative forklaringar gjeld for dei ulike karaktertrinna.
(2) Ved bruk av graderte karakterar blir bokstavkarakterane oppgjevne utan tillegg av pluss eller minus, både ved sensur av deleksamen og ved fastsetjing av endeleg karakter.
(3) Karakterskalaen bestått/ikkje bestått er eit sjølvstendig vurderingsuttrykk utan samanheng med gradert skala (A–F).
(4) Obligatoriske læringsaktivitetar blir vurdert som godkjent / ikkje godkjent.
(5) Alle deleksamenar som går inn i ein samla karakter, skal ha same vurderingsuttrykk. Same deleksamen kan ikkje gå inn i vurderingsgrunnlaget for fleire emne for ein og same student.
(6) For emne der endeleg karakter er slått saman av fleire deleksamenar, skal kvar enkelt deleksamen vere bestått for å oppnå bestått resultat i emnet. Dersom deleksamen og dermed endeleg karakter ikkje er bestått, skal det gå fram av emneplanen om alle delane må takast på nytt.
(7) Etter justerande munnleg eksamen kan karakteren på det skriftlege eller utøvande arbeidet justerast opp eller ned med maksimalt éin karakter, jf. § 9-3.
(8) Når resultatet av fleire eksamenar eller deleksamenar går inn i ein samla karakter, blir følgjande omrekningsskala nytta: A = 5, B = 4, C = 3, D = 2 og E = 1. Vanlege matematiske opphøgingsreglar blir nytta.

§ 13-10. Kunngjering av eksamensresultat

Kunngjering av eksamensresultat skjer på Studentweb.

§ 13-11. Rett på grunngjeving av karakter

(1) Ved munnleg og praktisk eksamen må krav om grunngjeving setjast fram straks etter at studenten har fått melding om karakteren. Det er ikkje høve til å klage på karakteren ved munnleg og praktisk eksamen.
(2) Ein student kan be om grunngjeving for karakteren på skriftleg eksamen innan ei veke etter kunngjeringa. Grunngjevinga skal gjere greie for dei generelle prinsipp som er lagt til grunn for sensuren og for bedømminga av studenten sin prestasjon, jf. universitets- og høyskoleloven § 11-8.
(3) Studenten kan be om grunngjeving på klagesensur.
(4) Grunngjevinga skal bli gitt innan to veker etter at studenten har bedt om det, jf. universitets- og høyskoleloven § 11-8. Sensoren vel sjølv om grunngjevinga skal bli gitt skriftleg eller munnleg.

§ 13-12. Klagefrist på karakterfastsetjing og trekkfrist

(1) Fristen for å klage på karakterfastsetjing når vurderingsforma er etterprøvbar er
  1. normalt tre veker frå eksamensresultatet er kunngjort, eller
  2. tre veker frå studenten har fått grunngjeving for karakteren av sensoren, eller
  3. tre veker frå endeleg avgjerd i klagen ligg føre dersom studenten har klaga over formelle feil på eksamen.
(2) Studenten kan trekkje klage på karakterfastsetting inntil klagen er avgjort. Klagen er avgjort når sensoren har registrert karakter i digitalt sensursystem eller signert vurderingsprotokoll.

§ 13-13. Ny vurdering ved klage på karakterfastsetjing

(1) Studenten har rett på ny vurdering ved klager på karakterfastsetjing på eksamen der vurderingsforma kan etterprøvast, jf. tabell i § 9-2.
(2) Det er individuell klagerett på karakterfastsetjing ved gruppeeksamen. Ei eventuell endring i karakteren etter klagesensur får berre verknad for den som har klaga.
(3) Ved klage på karakterfastsetjing skal studenten sitt eksamenssvar sendast til nye sensorar, der minst éin er ekstern, jf. universitets- og høyskoleloven § 11-11 andre ledd. Sensorrettleiing og emneplan skal leggjast ved eksamenssvaret. Sensorane kan òg få tilgang på nivåkontroll om dei ønskjer dette. Klagesensorane skal ikkje ha opplysningar om karakter eller grunngjeving for karakter eller klage. Dersom opphavleg sensur av eksamenssvara på eksamenen har vore delt mellom fleire sensorkommisjonar, bør ein eller fleire av dei andre opphavlege kommisjonane vere klagekommisjon(ar).
(4) Dersom den endelege karakteren er fastsett på grunnlag av ein skriftleg del og justerande munnleg eksamen jf. § 9-3, og karakteren blir endra etter ny sensur på den skriftlege delen, skal det gjennomførast ny justerande munnleg eksamen og fastsettast endeleg karakter, jf. universitets- og høyskoleloven § 11-11 fjerde ledd.
(5) Karakteren ved ny vurdering kan bli betre, lik eller dårlegare enn ved ordinær sensur.
(6) Det er ikkje klagerett på klagesensuren.

§ 13-14. Klage på formelle feil

(1) Studenten kan klage på formelle feil under eksamen, jf. universitets- og høyskoleloven § 11-9. Frist for å klage på formelle feil er tre veker etter at studenten vart kjend med eller burde vere kjend med det eller dei forholda som ligg til grunn for klagen, eller tre veker etter at studenten har mottatt grunngjeving for sensur eller har fått svar på klage på sensur.
(2) Dersom det er gjort formelle feil som kan ha hatt verknad for studenten sin prestasjon eller bedømminga av denne, blir sensurvedtaket oppheva. Når feilen kan rettast ved ny sensur av den innleverte eksamensoppgåva skal ein føreta ny sensurering. Når feilen ikkje kan rettast med ny sensur, kan høgskulen bestemme at det skal arrangerast ny eksamen. Ny sensur skal gjerast av minst to nye sensorar, kor minst éin er ekstern.
(3) Karakterfastsetting ved ny sensurering etter denne paragrafen, kan klagast på etter reglane i § 13-13.
(4) Klage over formelle feil skal handsamast av Eining for eksamen og i samråd med fagleg ansvarleg der det er aktuelt. Høgskulen si nemnd for studentsaker er klageinstans.

Kapittel 14. Vitnemål og karakterutskrift

§ 14-1. Grunnlag for vitnemål

(1) Vitnemål og Diploma Supplement for fullført grad eller utdanning ved Høgskulen på Vestlandet skal utferdast, jf. § 2-1 og universitets- og høyskoleloven § 11-12. Diploma Supplement er berre gyldig saman med vitnemålet.
(2) Det blir utferda vitnemål for fullført praktisk pedagogisk utdanning og eittårig yrkesdykkarutdanning.
(3) Vitnemålet og karaktergrunnlaget for vitnemålet skal innehalde opplysningar om:
  1. personalia
  2. alle emne som går inn i grunnlaget for graden eller yrkesutdanninga, inkludert eventuell praksis og emne frå annan institusjon som eventuelt er godskrive i graden
  3. emnekode, namn på emne, studiepoeng, karakter og karakterfordeling per emne og kva semester eksamen er avlagt
  4. sjølvstendig arbeid med eit omfang på minst 15 studiepoeng
  5. karaktersystemet
  6. Stadfesting av praksisopphald i utlandet, i tilfelle der dette ikkje gir studiepoeng og/eller deltaking i internasjonaliseringsaktivitetar heime.
(4) Eventuelle emne studenten har tatt ut over det som trengst for å kvalifisere til graden, blir dokumentert med karakterutskrift frå Vitnemålsportalen eller Studentweb.
(5) Det skal gå fram av vitnemål eller karakterutskrift, dersom ein privatist har fått prøvd kunnskapar og ferdigheiter på ein annan måte enn ein student med opptak til studiet, jf. universitets- og høyskoleloven § 11-12.

§ 14-2. Utferding av vitnemål

(1) Vitnemål for fullført grad, yrkesutdanning eller studieprogram, blir utferda automatisk for studentar som fullfører utdanninga på normert tid.
(2) Studentar som er forseinka i studieløpet, må sjølve be om å få vitnemål når utdanninga er fullført.
(3) Høgskulen på Vestlandet utferder vitnemål for ein fullført grad, ei yrkesutdanning eller eit studieprogram ein gong.
(4) Høgskulen kan utferde duplikat av tildelt papirvitnemål etter søknad. Styret fastset storleiken på vederlag for å skrive ut duplikat.
(5) Dersom studenten forbetrar resultat ved å ta ny eksamen etter å ha motteke vitnemål for fullført utdanning, blir dette dokumentert med karakterutskrift frå Vitnemålsportalen eller Studentweb.
(6) Dersom studenten har fått papirvitnemål og karakteren i vitnemålet blir endra etter klagesensur, pliktar studenten å levere inn vitnemålet. Det blir ikkje laga nytt vitnemål før det første vitnemålet er levert inn.

§ 14-3. Karakterutskrift

(1) Vidareutdanning, studieprogram av mindre omfang, emne, ikkje fullført grad eller yrkesutdanning blir dokumentert ved karakterutskrift frå Vitnemålsportalen eller Studentweb.
(2) Alle karakterutskrifter frå Høgskulen på Vestlandet skal innehalde opplysningar om:
  1. personalia.
  2. emne som er tekne ved Høgskulen på Vestlandet.
  3. emnekode, namn på emne, studiepoeng, karakter og karakterfordeling per emne og kva semester eksamen er avlagt.
  4. karaktersystemet.

Kapittel 15. Iverksetjing og overgangsordningar

§ 15-1. Iverksetjing

§ 15-2. Overgangsordning for studie- og emneplanar

Ordningar i studie- eller emneplanar vedtekne våren 2025, som er i strid med nye reglar i forskrifta, kan gjennomførast etter tidlegare vedteken ordning i studieåret 2025–2026.

Refereres av

1 dokument(er) refererer hit.